لاہور: وزیر اعلیٰ پنجاب مریم نواز نے پاکستان تحریک انصاف (پی ٹی آئی) کے اسلام آباد میں جاری احتجاج پر کہا ہے کہ ان کے لشکر میں تربیت یافتہ دہشتگرد شامل ہیں۔
سماجی رابطوں کی سائٹ ایکس پر مریم نواز نے پی ٹی آئی کو خوب تنقید کا نشانہ بنایا۔ انہوں نے کہا کہ ہمیشہ سے جو بات کہتی رہی ہوں آج دنیا کے سامنے آ گئی ہے، پی ٹی آئی سیاسی جماعت ہے، تھی اور نہ ہو سکتی ہے۔
مریم نواز نے کہا کہ یہ ایک دہشتگرد جماعت ہے جو بار بار اپنے ہی ملک پر حملہ آور ہوتی ہے، ریاست کو ان کے ساتھ وہی سلوک کرنا چاہیے جو دہشتگردوں کے ساتھ کیا جاتا ہے ورنہ بہت دیر ہو جائے گی۔
وزیر اعلیٰ نے کہا کہ تحریک انصاف کے بھیس میں تحریک انتشار کا واحد مقصد ملک میں آگ لگانا ہے، یہ کسی رعایت یا نرمی کے مستحق نہیں، ان کے لشکر میں فرنٹ لائنز میں تربیت یافتہ دہشتگرد شامل ہیں جن کو انہوں نے پولیس اور ریاست پر حملہ آور ہونے کیلیے استعمال کیا ہے۔
انہوں نے سوال کیا کہ کون سا ملک یہ برداشت کرتا ہے؟
مریم نواز نے ایک ٹوئٹ میں پتھراؤ سے شدید زخمی ہونے والے کانسٹیبل کی تصویر شیئر کی اور لکھا کہ کیا ایسی حرکت کوئی سیاسی جماعت کر سکتی ہے؟ یہ پہلی بار نہیں ہے۔
