فیصل آباد / چنیوٹ : شہباز ٹاؤن میں چور مسجد کا چندے کا بکس چرا کر لے گئے، امام مسجد نے مقدمے کیلئے درخواست دے دی، چنیوٹ میں خاتون سمیت 21 منشیات فروشوں کو گرفتار کرلیا گیا۔
تفصیلات کے مطابق فیصل آباد کے علاقے شہباز ٹاؤن میں چور مسجد کا چندے کا بکس چرا کر لے گئے ہیں، اس حوالے سے پولیس حکام کا کہنا ہے کہ مسجد بہار مدینہ میں چندے کا بکس توڑنے کی واردات 28ستمبر کی رات کو کی گئی تھی۔
اے آر وائی نیوز نے چندے کے باکس توڑنے کی فوٹیج حاصل کرلی، فوٹیج میں دو افراد کو مسجد کے باہر گاڑی کھڑی کرتے ہوئے دیکھا جاسکتا ہے۔
ملزمان ایک گاڑی کی آڑ میں چندے کے باکس کا تالا توڑتے نظر آرہے ہیں، ملزمان کو واردات کے بعد بھاگتے ہوئے دیکھا جاسکتا ہے۔
امام مسجد نے تھانہ جھنگ بازار میں مقدمے کیلئے درخواست دے دی ہے، پولیس نے ملزمان کی گرفتاری کیلیے مختلف مقامات پر چھاپے مارے ہیں، تاہم ابھی تک کوئی گرفتاری عمل میں نہیں آئی۔
علاوہ ازیں چنیوٹ میں پولیس نے منشیات فروشوں کیخلاف کا میاب کارروائی کرتے ہوئے خاتون سمیت21ملزمان کو گرفتار کرلیا،
پولیس کے مطابق گرفتار ملزمان کے قبضہ سے اسلحہ اور منشیات برآمد ہوئی ہے ملزمان کیخلاف مقدمہ درج کرلیا گیا ہے۔
