ریاض: سعودی حکام کا کہنا ہے کہ سعودی عرب میں فیکٹریاں ہر ہفتے لاکھوں کی تعداد میں ماسک تیار کر رہی ہیں اور ماسک کی کوئی قلت نہیں۔

سعودی ویب سائٹ کے مطابق سعودی فوڈ اینڈ ڈرگ اتھارٹی (ایف ڈی اے) نے جاری اپنے بیان میں شہریوں اور مملکت میں مقیم غیر ملکیوں کو اطمینان دلایا ہے کہ ماسک بڑی تعداد میں موجود ہیں لہٰذا اس حوالے سے پریشان ہونے کی ضرورت نہیں۔

سعودی فوڈ اینڈ ڈرگ اتھارٹی نے بتایا ہے کہ سعودی فیکٹریاں ہر ہفتے لاکھوں حفاظتی ماسک تیار کر رہی ہیں۔

دوسری جانب وزارت صحت کے مطابق سعودی عرب نے سینی ٹائزر تیار کرنے والی فیکٹریوں کی تعداد بھی بڑھا کر 31 کرلی ہے۔

حکام کا کہنا ہے کہ یہ اقدام کرونا وائرس کے پھیلاؤ کو روکنے کے لیے سینی ٹائزر کی بڑھتی ہوئی ضروریات کے پیش نظر کیا گیا ہے، پوری دنیا میں اس وقت سینی ٹائزر کی طلب میں بہت زیادہ اضافہ ہوچکا ہے۔

وزارت صحت کا کہنا ہے کہ جب سے کرونا وائرس بحران شروع ہوا ہے تب سے تمام طبی آلات اور کرونا سے بچاؤ میں کام آنے والی ادویات کی برآمد بھی معطل کردی گئی ہے۔