مظفر آباد : صدر آزاد کشمیر مسعود خان نے کہا ہے کہ نریندر مودی صرف کشمیری مسلمان ہی نہیں پوری اسلامی دنیا کے ساتھ جنگ کررہا ہے جبکہ ہماری جنگ ہندوؤں نہیں بلکہ آر ایس ایس کے نظریے کیخلاف ہے۔
ان خیالات کا اظہار انہوں نے مظفر آباد میں میڈیا سے گفتگو کرتے ہوئے کہی، انہوں نے کہا کہ دنیا کی7ارب آبادی میں دو ارب آبادی مسلمانوں پر مشتمل ہے۔
بھارت کا وزیر اعظم صرف کشمیری مسلمانوں ہی نہیں پوری اسلامی دنیا کے ساتھ جنگ کررہا ہے اس کے علاوہ نریندر مودی نے نچلی ذات کے ہندوؤں اور عیسائیوں کے خلاف بھی اعلان جنگ کردیا ہے۔
صدر آزاد کشمیر کا مزید کہنا تھا کہ ہماری جنگ ہندوؤں نہیں بلکہ آرایس ایس کے ہندوتوا نظریے کیخلاف ہے، اسلام کسی کی زمین پر قبضے کی خاطر جنگ کو جہاد نہیں کہتا۔
انہوں نے کہا کہ کشمیری عوام کا آرٹیکل370سے کوئی لینا دینا نہیں ہے یہ ایک شیطانی سمجھوتہ تھا، بھارت میں بڑی سول سوسائٹی بھی مودی کیخلاف اٹھ کھڑی ہوئی ہے۔
