مظفرآباد: صدر آزاد جموں و کشمیرسردار مسعود خان کا کہنا ہے کہ کرفیو سے مقبوضہ علاقے میں خوراک اور ادویات کی قلت ہے۔
تفصیلات کے مطابق صدر آزاد جموں وکشمیر سے 22 ركنی ترک صحافیوں کے وفد نے ملاقات کی، صدر آزاد کشمیر نے وفد کومقبوضہ کشمیرکی صورت حال سے آگاہ کیا۔
مسعود خان نے کہا کہ بھارت مقبوضہ کشمیرمیں ظلم وجبرکی نئی تاریخ رقم کر رہا ہے، 46 دن سے 80 لاکھ کشمیری بھارتی فوج کے نرغے میں ہیں۔
صدر آزاد جموں و کشمیر نے کہا کہ کرفیو سے مقبوضہ علاقے میں خوراک اور ادویات کی قلت ہے، مقبوضہ کشمیرکےعوام اذیت ناک صورت حال سے گزر رہے ہیں۔
انہوں نے کہا کہ ترکی نے منصفانہ موقف اپنا کراسلامی بھائی چارے کا ثبوت دیا، ترک وفد نے کہا کہ آزاد کشمیرکے لوگوں کو بنیادی حقوق وشہری آزادیاں حاصل ہیں۔
مقبوضہ کشمیرمیں 46ویں روز بھی کرفیو
واضح رہے کہ مقبوضہ کشمیر میں آج مسلسل 46ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔
کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔
