مستونگ اور ہنگو سانحے پر اقوام متحدہ، ایران، امریکا اور برطانیہ کی جانب سے شدید مذمت کا اظہار کرتے ہوئے متاثرین سے تعزیت کی ہے۔
اقوام متحدہ
اقوام متحدہ کے سیکرٹری جنرل انتونیوگوتریس نے کہا کہ پاکستان میں دہشت گردانہ حملوں کی پرزور مذمت کرتے ہیں، ان کا کہنا تھا کہ پاکستان میں دہشت گردی کے ذمہ داروں کو کٹہرے میں لایا جائے۔
سیکرٹری جنرل اقوام متحدہ نے کہا کہ مذہبی تقریبات کے دوران گھناؤنا حملہ کیا گیا، لوگوں کو پُرامن مذہبی تقریب کے دوران نشانہ بنانا خوفناک عمل ہے۔
امریکا
امریکی سفارتخانے سے جاری بیان میں کہا گیا کہ بھیانک حملوں کا مقابلہ کرنے میں پاکستان کے ساتھ کھڑے رہیں گے، پاکستانی عوام اپنے عقیدے کے مطابق تہوار منانے کے مستحق ہیں، ہمارے دل متاثرین اور ان کے اہل خانہ کے لیے دکھی ہیں۔
برطانیہ
برطانوی ہائی کمشنر جین میریٹ نے ٹویٹ کیا کہ مستونگ اور ہنگو دھماکوں میں قیمتی جانوں کے ضیاع پرشدید افسوس ہے، ہماری دنیا میں تشدد کی کوئی جگہ نہیں ہے، میرا دل مشکل وقت میں متاثرین اور ان کے اہل خانہ کے ساتھ ہے۔
Devastated by today’s suicide attack and loss of precious lives in #Mastungblast, Balochistan. Violence has no place in our world. My heart goes out to the victims and their families during this incredibly difficult time.
— Jane Marriott (@JaneMarriottUK) September 29, 2023
ایران
ایران کے صدر سید ابراہیم رئیسی نے تہران سے جاری اپنے پیغام میں کہا ہے کہ دہشت گردوں کا مقصد مسلمانوں میں تفریق پیدا کرنا ہے۔
صدر پاکستان ڈاکٹر عارف علوی کے نام اپنے پیغام میں ایران کے صدر سید ابراہیم رئیسی نے حکومت اور پاکستانی عوام سے ہمدردی کا اظہار کیا۔
انہوں نے کہا کہ مستونگ دھماکے میں معصوم لوگ شہید اور زخمی ہوئے، دہشت گردی اور انتہا پسندی سے لڑنے کے لیے پاکستان سے تعاون کو تیار ہیں۔
