لاہور: ایچ بی ایل پی ایس ایل 10 کے میچ آفیشلز کے ناموں کا اعلان کردیا گیا۔
پی ایس ایل سیزن 10 میں 13 امپائرز اور 7 میچ ریفریز ذمہ داریاں نبھائیں گے، ایونٹ 11 اپریل سے 18 مئی تک کھیلا جائے گا۔
آئی سی سی ایلیٹ پینل کے احسن رضا، پال رائفل، کمار دھرما سینا امپائرز پینل کا حصہ ہیں، ان کے علاوہ الیکس واف اور کرس براؤن بھی امپائرز پینل میں شامل ہیں۔
پاکستان سے علیم ڈار، آصف یعقوب، فیصل آفریدی، راشد ریاض بھی ذمہ داری نبھائیں گے، یہ تمام آفیشل پی سی بی کے انٹرنیشنل امپائرز کا حصہ ہیں۔
پی سی بی ایلیٹ پینل کے عبدالمقیت، ناصر حسین، طارق رشید، ذوالفقار جان بھی امپائرنگ کریں گے، علیم ڈار آخری مرتبہ پی ایس ایل میں امپائرنگ کریں گے۔
آئی سی سی ایلیٹ پینل آف میچ ریفری رنجن مدوگالے، سری لنکن روشن مہاناما کے ساتھ میچز کی نگرانی کریں گے، دیگر میچ ریفریز میں علی نقوی اور محمد جاوید ملک شامل ہیں۔
ٹورنامنٹ میں افتخار احمد، اقبال شیخ اور ندیم ارشد بھی آفیشلز ہوں گے۔
