راولپنڈی: عدالتی حکم کے بعد سینئر صحافی مطیع اللہ جان کو اڈیالہ جیل سے رہا کردیا گیا، 10 ہزار روپے مچلکوں کے عوض ضمانت منظور ہوئی۔
تفصیلات کے مطابق گزشتہ دنوں پولیس کے ہاتھوں گرفتار ہونے والے سینئر صحافی مطیع اللہ جان کو رہائی مل گئی، اڈیالہ جیل حکام نے روبکار پہنچنے کے بعد مطیع اللہ جان کو رہا کیا، انسداددہشت گردی عدالت نے منشیات مقدمے میں آج ان کی ضمانت منظور کی تھی۔
عدالت نے 10 ہزار روپے مچلکوں کےعوض ان کی ضمانت منظور کی، انھیں انسداد دہشتگردی عدالت کے جج طاہر عباس سپرا کی عدالت میں پیش کیا گیا تھا۔
اس سے قبل انسداد دہشت گردی کی عدالت نے صحافی مطیع اللہ جان کی ضمانت منظور کرتے ہوئے انھیں رہا کرنے کا حکم دے دیا۔
مطیع اللہ جان کی ضمانت منظور ، رہا کرنے کا حکم
عدالت نے تفتیشی افسر سے پوچھا تھا کہ ہائیکورٹ کے حکم نامے کی کاپی دیں روبکار کہاں ہے؟ حکم نامے کو ریکارڈ کے ساتھ لگائیں، درخواست ضمانت پر نوٹس کررہا ہوں۔
گذشتہ رو ز اسلام آباد ہائی کورٹ نے صحافی کا دو روزہ جسمانی ریمانڈ کا دہشت گردی عدالت کا فیصلہ معطل کردیا تھا۔
