کراچی : سربراہ جے یوآئی (ف) مولانا فضل الرحمان آج کراچی پہنچیں گے جہاں وہ ایم کیو ایم اور جے ڈی اے قیادت سے ملاقات کریں گے۔
تفصیلات کے مطابق صدارتی انتخاب کے لیے ن لیگ اور دیگر اپوزیشن جماعتوں کے مشترکہ امیدوار مولانا فضل الرحمان آج کراچی پہنچیں گے۔
جے یوآئی (ف) کے سربراہ مولانا فضل الرحمان ایم کیوایم اورفنکشنل لیگ کے رہنماؤں سے ملاقاتیں کریں گے، دونوں جماعتوں سے صدارتی انتخاب میں حمایت کی درخواست کی جائے گی۔
مولانا فضل الرحمان گرینڈ ڈیموکریٹک الائنس کے صدر پیرصاحب پگاڑا سے شام 5 بجے کنگری ہاؤس میں ملاقات کریں گے۔
سربراہ جے یوآئی (ف) شام سات بجے ایم کیو ایم کے عارضی مرکز بہادرآباد بھی جائیں گے جہاں ان کی ملاقات خالد مقبول صدیقی اور دیگرپارٹی رہنماؤں سے ہوگی۔
خیال رہے کہ پیپلزپارٹی کی جانب سے نامزد امیدوار اعتراز احسن، تحریک انصاف کے ڈاکٹر عارف علوی جبکہ ن لیگ اور دیگراپوزیشن جماعتوں کے نامزد امیدوار جمعیت علمائے اسلام کے سربراہ مولانا فضل الرحمان ہیں۔
واضح رہے کہ ملک کے 13 ویں صدر کے انتخاب کے لیے پولنگ 4 ستمبرکو ہوگی اور سینیٹ، قومی اسمبلی اور چاروں صوبائی اسمبلیوں پرمشتمل الیکٹورل کالج صدرمملکت کا انتخاب کرے گا۔
صدراتی انتخاب کے لیے پولنگ کا عمل صبح 10 بجے سے شام 4 بجے تک جاری رہے گا۔
