اسلام آباد: سپریم کورٹ نے مولانا ہدایت الرحمان کو ضمانت پر رہا کرنے کا حکم دے دیا۔
تفصیلات کے مطابق سپریم کورٹ نے مولانا ہدایت الرحمان بلوچ کو ضمانت پر رہا کرنے کا حکم دے دیا ہے، تین لاکھ کے دو ضمانتی مچلکوں کے عوض ضمانت منظور ہوئی۔
جسٹس سردار طارق مسعود کی سربراہی میں تین رکنی بینچ نے کیس کی سماعت کی، وکیل کامران مرتضٰی کا کہنا تھا کہ مولانا ہدایت الرحمان کو احاطہ عدالت سے گرفتار کیا گیا، جسٹس سردار طارق مسعود نے استفسار کیا کہ احاطہ عدالت سے گرفتاری کو چیلنج کیوں نہیں کیا گیا؟
جسٹس محمد علی مظہر نے سوال کیا کہ کیا ہدایت الرحمان پر پولیس اہل کار کے قتل پر اکسانے اور اعانت کا الزام ہے؟ جس پر وکیل نے کہا کہ ہدایت الرحمان پر اکسانے کا الزام ہے، اُن کی تحریک پانی کی فراہمی سے متعلق ہے۔
واضح رہے کہ مولانا ہدایت الرحمان کو قتل کے الزام میں 13 جنوری 2023 کو گوادر سے گرفتار کیا گیا تھا۔
