غزہ میں نہتے فلسطینیوں پر اسرائیل کے جاری مظالم پر پاکستانی شوبز انڈسٹری کی معروف اداکارہ ماورا حسین عالمی برداری پر برس پڑیں۔
ماورا حسین نے سماجی رابطوں کی ویب سائٹ ایکس پر اقوام متحدہ اور اس کی انسانی حقوق کی تنظیم کو مخاطب کرتے ہوئے لکھا کہ وہاں بچے مر رہے ہیں جبکہ عالمی رہنما سو رہے ہیں۔
پاکستانی اداکارہ نے لکھا کہ یہ انسانی جانوں کا معاملہ ہے، فلسطین میں تمام مذاہب کے لوگوں کو تشدد سے مارا جا رہا ہے، دنیا اس پر اتنی خاموش یا غیر جانبدار کیوں ہے؟
انہوں نے ایکس صارفین سے درخواست کی کہ آپ اس بارے میں جو کچھ دیکھیں اسے ری ٹوئٹ کریں اور غزہ میں نسل کشی کے خلاف آواز اٹھائیں۔
Children are dying while the world leaders sleep!!!! @UN @UNHumanRights #FREEPALESTINE
This is about human lives.. people of all religions are being violently killed in Palestine.
Why’s the world so quiet or neutral on this ?
Please retweet everything you see, raise your…— MAWRA HUSSAIN (@MawraHocane) October 13, 2023
اس سے قبل نامور اداکارہ اشنا شاہ نے انسٹاگرام اسٹوری پر اپنے بیان میں لکھا تھا کہ اسرائیلیوں کی حمایت کرنے والے اور سوشل میڈیا پر جعلی خبریں پوسٹ کرنے والے لوگ جن کی جانب سے یہ تاثر دینے کی کوشش کی جا رہی ہے کہ حماس بیدردی سے اسرائیلی خواتین اور بچوں کا قتل عام کر رہا ہے، یہ وہ یہودی اور امریکی لوگ ہیں جنہیں میں میں جانتی ہوں۔
اشنا شاہ نے کہا کہ آپ کی پوسٹ سے آپ کی جہالت ظاہر ہو رہی ہے، آپ کی لا علمی اس بات کا واضح ثبوت ہے کہ آپ سمجھتے ہیں کہ یہودیوں کی زندگی عربوں سے زیادہ اہمیت رکھتی ہے، اگر آپ کا میڈیا اور کمیونٹی آپ کو تعصب کا شکار کر رہی ہے، تو یہ آپ پر ہے کہ آپ خود کو تعلیم دیں اور سچ کو پرکھیں۔
اداکارہ کا کہنا تھا کہ میں آپ کی طرف سے جو پوسٹس دیکھ رہی ہوں انہیں دیکھ کر کسی کا بھی دل دہل جائے، کیونکہ وہ ناقابل یقین حد تک غلط معلومات پر مبنی ہیں۔
