راولپنڈی: بانی پی ٹی آئی اور شیخ رشید کے خلاف 9 مئی کے مقدمات میں تین رہنما واثق قیوم، صداقت عباسی اور عمر تنویر بٹ وعدہ معاف گواہ بن گئے۔
تفصیلات کے مطابق بانی پی ٹی آئی اور شیخ رشید کے خلاف نومئی کے مقدمات میں سابق اسپیکر پنجاب اسمبلی واثق قیوم، سابق رکن قومی اسمبلی صداقت عباسی، عمر تنویربٹ اور کرنل ریٹائرڈ اجمل صابر وعدہ معاف گواہ بن گئے۔
پولیس ذرائع نے بتایا کہ صداقت عباسی، واثق قیوم اور عمر تنویر بٹ نےایک سوچون کا بیان ریکارڈ کرالیاہے۔
جس میں تینوں رہنماؤں نے کہا ہے کہ نومئی کی پلاننگ شیخ رشید، راجہ بشارت، شیخ راشدشفیق، اعجاز خان جازی، راشد حفیظ اور بانی پی ٹی آئی کی ایماء پرکی گئی۔
این اے ترپن میں پی ٹی آئی کے حمایت یافتہ امیدوار کرنل ر یٹائرڈ اجمل صابر بھی شیخ رشید کےخلاف وعدہ معاف گواہ بن گئے۔
اجمل صابر نے پولیس کو بیان دیاکہ شیخ رشید نے چھ مئی کو لال حویلی میں اجلاس بلایا تھا، جہاں نومئی کی پلاننگ کی گئی تھی۔
انسداد دہشت گردی عدالت نے بانی پی ٹی آئی، شیخ رشید اور شیخ راشد شفیق کو چھ فروری کو طلب کرلیا۔
