ترکی اور فرانس میں یوم مئی کی ریلی پر پولیس پل پڑی۔ استنبول میں ریلی کے دوران پولیس کی گاڑی کی زد میں آ کر ایک شخص ہلاک ہوگیا۔
غیر ملکی خبر رساں ادارے کے مطابق یوم مئی کے حوالے سے ترک شہر استنبول میں 25 ہزار کے قریب افراد نے ریلی نکالی۔ پولیس نے تقسیم اسکوائر کو احتجاج کے پیش نظر مکمل طور پر سیل کر دیا تھا۔ پرتشدد مظاہرین نے تقسیم اسکوائر کی طرف جانے کی کوشش کی۔ مظاہرین کو منتشر کرنے کے لیے پولیس نے آنسو گیس کے شیل فائر کیے اور واٹر کینن سے پانی برسایا۔
پولیس کے واٹر کینن گاڑی کی زدمیں آ کر ایک شخص موت کے منہ میں چلا گیا۔ پولیس نے احتجاج کرنے والے 200 کے قریب افراد کو حراست میں لے لیا ہے۔ استنبول کے گورنر کے مطابق مظاہرین سے درجنوں دستی بم اور آتشیں گولے برآمد کیے گئے ہیں۔
دوسری جانب فرانس کے دارالحکومت پیرس میں بھی 17 ہزار کے قریب افراد نے یوم مئی کے موقع پر احتجاج کرتے ہوئے مارچ کیا۔ پولیس نے مظاہرین کو روکنے کی کوشش میں ان پر آنسو گیس کے شیل فائر کیے۔
