کراچی : میئر کراچی وسیم اختر نے کہا ہے کہ پیپلزپارٹی کے لوگ کچی آبادیوں میں چائنہ کٹنگ کررہے ہیں، ان کا کہنا ہے کہ وزیر اعلیٰ سندھ پہلے اپنے اختیارات تو لے لیں پھر کسی اور کی بات کریں۔
ان خیالات کا اظہار انہوں نے وزیر اعلیٰ سندھ کے بیان کے بعد اے آر وائی نیوز سے خصوصی بات چیت کرتے ہوئے کیا، وسیم اختر کا کہنا تھا کہ وزیراعلیٰ سندھ مراد علی شاہ پہلے اپنے اختیارات تو لے لیں وہ جس پولیس افسر کو ہٹاتے ہیں وہ دوسرے دن واپس آجاتا ہے۔
انہوں نے کہا کہ قبضہ مافیا کے خاتمے کے لئے کام کررہا ہوں، پیپلزپارٹی کے لوگ کچی آبادیوں میں چائنہ کٹنگ کررہے ہیں۔
ایک سوال کے جواب میں ان کا کہنا تھا کہ وزیراعلیٰ سندھ سے ملاقات کر کے انہیں ایک اسکیم بناکردی تھی اور صوبائی وزیر بلدیات جام خان شورو کو بھی اسکیم سے متعلق آگاہ کیا تھا، جس کے بعد 26دسمبر 2016 کو وہ سمری وزیراعلیٰ سندھ کو بھیج دی گئی تھی لیکن سمری وزیراعلیٰ کے پاس اب تک پڑی ہے ان کو کوئی پرواہ ہی نہیں ہے۔
مزید پڑھیں : میئر کراچی کو اختیارات دے کر چائنا کٹنگ کا رواج زندہ نہیں کرسکتے، وزیراعلیٰ
یاد رہے کہ وزیراعلیٰ سندھ کے ترجمان نے میئر کراچی کے پریس کانفرنس پر رد عمل ظاہر کرتے ہوئے کہا تھا کہ سندھ حکومت ایسے اختیارات کسی کو نہیں دے سکتی جس کے ذریعے شہر میں چائنا کٹنگ کا رواج دوبارہ زندہ ہو جائے۔
مزید پڑھیں : صفائی مہم، میئر کراچی کو 100 نمبر دیتے ہیں، رابطہ کمیٹی
ترجمان نے کہا کہ میئر کراچی نے 100 دن کی صفائی مہم میں صرف ایک دن صفائی کا کام فوٹو سیشن کے لیے کیا اور بقیہ ننانوے دن اختیارات کا رونا روتے رہے۔
