صدر پاکستان میڈیکل کمیشن ڈاکٹر نوشاد احمد شیخ نے ایم ڈی کیٹ کے امتحانات کے حوالے سے مجوزہ تاریخ کا عندیہ دے دیا۔
تفصیلات کے مطابق صدر پی ایم سی ڈاکٹر نوشاد احمد شیخ کی صوبائی میڈیکل کالجوں کے وائس چانسلرز کے مابین ایم ڈی کیٹ حوالے سے ملاقاتیں ہوئی ہیں۔
وفاقی دارالحکومت اور خیبر پختونخواہ کے میڈیکل کالجز کے وائس چانسلرز نے صدر پی ایم سی سے ان کے دفتر میں ملاقات کی۔ ملاقات میں ایم ڈی کیٹ امتحانات کو صوبائی سطح پر کامیابی سے منعقد کروانے پر حکمت عملی پر غور کیا گیا۔
اس حوالے سے ذرائع کا کہنا ہے کہ ایم ڈی کیٹ امتحان 2022 صوبائی سطح پر میڈیکل یونیورسٹیوں کی معاونت سے منعقد کرایا جائے گا۔
ذرائع کے مطابق ایم ڈی کیٹ امتحان رواں سال نومبر 13 یا 20 نومبر کرانے کی تجویز زیر غور ہے۔ ملاقات میں سندھ، اسلام آباد، اور خیبر پختون خوا کی تمام میڈیکل یونیورسٹیوں کا ایم ڈی کیٹ امتحان 13 نومبر یا 20 نومبر کو کرانے پر اتفاق کیا گیا۔
ایم ڈی کیٹ امتحان کا نصاب پہلے والا ہی رہے گا جو پی ایم سی کی ویب سائٹ پر موجود ہے۔ پی ایم سی کی جانب سے تمام امیدواروں کیلئے پورے ملک میں ایک ہی وقت اور دن پر ایک ہی امتحان کرایا جائے گا۔
ایم ڈی کیٹ امتحان کا نتیجہ امتحان ختم ہونے کے 7 دنوں بعد بتایا جائے گا۔ ایم بی بی ایس کی باقاعدہ کلاسز کا آغاز اگلے سال فروری سے شروع کرنے پر بھی غور کیا گیا۔
ذرائع کے مطابق مشاورتی اجلاس میں پیش کی جانے والی تمام سفارشات کا حتمی فیصلہ کونسل میٹنگ سے مشروط ہے۔
صدر پی ایم سی کا کہنا ہے کہ معذور طلبا کا کوٹہ ملک بھر کے سرکاری میڈیکل کالجز میں دو فیصد ہوگا۔ سال 2021 کے ایم ڈی کیٹ امتحان میں 65 فیصد نمبر سے کم لینے والے طلبا کو دوبارہ امتحان دینا پڑے گا۔
