کراچی میں میڈیکل اینڈ ڈینٹل کالج ایپٹی ٹیوڈ ٹیسٹ (ایم ڈی کیٹ) ٹیسٹ کا آج دوبارہ انعقاد ہوا ہے، کراچی میں ایکسپو سینٹر میں امتحانی مرکز قائم کیا گیا ہے۔
تفصیلات کے مطابق ڈاؤ یونیورسٹی آف ہیلتھ سائنسز کے تحت کراچی سمیت سندھ بھر میں میڈیکل اینڈ ڈینٹل کالج ایپٹی ٹیوڈ ٹیسٹ (ایم ڈی کیٹ) برائے سال 24-2023 کا پر امن آغاز ہوگیا۔
جس میں صوبے بھر سے 41 ہزارسے زائد طلبہ و طالبات حصہ لے رہے ہیں، ایم ڈی کیٹ کا انعقاد کراچی میں مین یونیورسٹی روڈ پر واقع ایکسپو سینٹر کراچی، جامشورو میں لیاقت یونیورسٹی آف میڈیکل اینڈ ہیلتھ سائنسز ، شہید بے نظیر آبادمیں بلاول اسپورٹس کمپلیکس نوابشاہ ، لاڑکانہ میں پولیس ٹریننگ اسکول ، پی ٹی ایس بس ٹرمینل لاڑکانہ میں بیک وقت کیا گیا ہے۔
کراچی ایکسپو سینٹر میں میں لگ بھگ 15000، جامشورو سے 13000، نوابشاہ (شہید بے نظیر آباد)سے 4000 جبکہ لاڑکانہ سے 9000 طلباء حصہ لے رہے ہیں۔
ایکسپو سینٹر کراچی میں لڑکے اور لڑکیوں کے لئے علیحدہ علیحدہ انٹری پوائنٹ رکھے گئے ہیں، اس ضمن میں کسی بھی ہنگامی صورتحال سے نمٹنے کے لئے سیکیورٹی کے انتہائی سخت انتظامات کئے گئے ہیں جس میں قانون نافذ کرنے والے ادارے رینجرز اور پولیس سمیت ایمبولینسز اور طبی امدادی رضاکاربھی موجود ہیں۔
یاد رہے کہ صوبے بھر میں پبلک پرائیوٹ میڈیکل اینڈ ڈینٹل انسٹی ٹیوشنزمیں ایم بی بی ایس کی 3600 اور بی ڈی ایس کی 1190 نشستوں کے لئے 41000 طلبہ و طالبات ٹیسٹ میں حصہ لے رہے ہیں۔
