The news is by your side.

Advertisement

لاہور: صفائی کی ناقص صورتحال پر اہم افسر عہدے سے فارغ

لاہور: صوبہ پنجاب کے دارالحکومت لاہور میں صفائی کی ناقص صورتحال پر وزیر اعلیٰ عثمان بزدار نے اپنی وارننگ کو عملی جامہ پہنا دیا، سالڈ ویسٹ مینجمنٹ کمپنی کے مینجنگ ڈائریکٹر شاہ زیب حسن کو عہدے سے ہٹا دیا گیا۔

تفصیلات کے مطابق لاہور کی سالڈ ویسٹ مینجمنٹ کمپنی کے مینجنگ ڈائریکٹر شاہ زیب حسن کو عہدے سے ہٹا دیا گیا، شاہ زیب حسن کو لاہور میں صفائی کے ناقص اقدامات پر ہٹایا گیا۔

گزشتہ روز لاہور ویسٹ مینجمنٹ بورڈ میٹنگ میں ایم ڈی پر تحفظات کا اظہار ہوا تھا جبکہ اس سے قبل وزیر اعلیٰ پنجاب عثمان بزدار نے بھی لاہور میں صفائی کی ناقص صورتحال پر افسران کو وارننگ دی تھی۔

وزیر اعلیٰ پنجاب عثمان بزدار نے عید الاضحیٰ کے بعد کہا تھا کہ صفائی پر کوئی سمجھوتہ نہیں کیا جائے گا، شکایت آنے پر عملے کے خلاف تادیبی کارروائی ہوگی۔

وزیر اعلیٰ نے شہر میں صفائی آپریشن مؤثر انداز سے جاری رکھنے کی ہدایت کی تھی اور کہا تھا کہ شہروں کی صفائی کے لیے تمام ممکنہ وسائل فراہم کردیے گئے ہیں۔

بعد ازاں شہر کے مختلف علاقوں کے اچانک دورے کے دوران انہوں نے صفائی کی ناقص صورتحال دیکھ کر غفلت برتنے والے عملے کے خلاف کارروائی کا حکم بھی دیا تھا۔

عثمان بزدار کا کہنا تھا کہ سرکاری فرائض میں کوتاہی برداشت نہیں کی جائے گی، فرائض میں غفلت برتنے والے افسر کو عہدے پر رہنے کا حق نہیں ہے۔

Comments

یہ بھی پڑھیں