ریاض: مکہ مکرمہ کے کلاک ٹاور پر ’گھر پر رہو‘ کا پیغام درج کردیا گیا، اقدام کرونا وائرس کا پھیلاؤ روکنے کے لیے گھر پر رہنے کی اہمیت کو اجاگر کرنے کے لیے کیا گیا ہے۔
سعودی ویب سائٹ کے مطابق سوشل میڈیا پر مکہ کلاک ٹاور کی ایک تصویر وائرل ہو رہی ہے جس میں کلاک ٹاور پر یہ پیغام درج ہے خلیک بالبیت یعنی ’گھر میں رہو‘۔
مکہ کلاک ٹاور پر گھر میں رہو کا پیغام کرونا وائرس کے پھیلاؤ کو روکنے کے لیے گھروں میں رہنے کی پابندی کی اہمیت کو اجاگر کرنے کے لیے دیا گیا ہے۔
ٹاور کی تصاویر برج الساعۃ کے ہیش ٹیگ کے ساتھ ٹویٹر اور دیگر سوشل میڈیا پلیٹ فارمز پر وائرل ہیں۔
صارفین نے کرونا وائرس سے نمٹنے کے لیے گھر تک محدود رہنے کی اس تاکید کے منفرد انداز پر پسندیدگی کا اظہار کیا تھا۔ اس سے قبل کلاک ٹاور پر کرونا وائرس سے نمٹنے کے لیے حفاظتی تدابیر سے متعلق پیغام بھی دیا گیا تھا۔
یہ کلاک ٹاور مسجد الحرام کے سامنے ہے اور دنیا کے بلند ترین ٹاورز میں سے ایک ہے، اس کے بالائی حصے میں دنیا کی سب سے بڑی گھڑی نصب ہے۔
خیال رہے کہ سعودی عرب میں اب تک کرونا وائرس کے 4 ہزار 934 کیسز کی تصدیق ہوچکی ہے جبکہ وائرس سے 65 اموات ہوچکی ہیں۔
