تازہ ترین

حکومت کا ججز کے خط پر انکوائری کمیشن بنانے کا اعلان

اسلام آباد: وفاقی حکومت نے اسلام آباد ہائی کورٹ...

فوجی عدالتوں سے 15 سے 20 ملزمان کے رہا ہونے کا امکان

اسلام آباد : اٹارنی جنرل نے فوجی عدالتوں سے...

عمران خان کی زیر صدارت مرکزی قیادت کی بیٹھک، کیا اہم فیصلے ہوئے؟

پی ٹی آئی چیئرمین عمران خان کی زیر صدارت گزشتہ روز لاہور میں ان کی رہائشگاہ زمان پارک میں اجلاس ہوا جس میں کئی اہم فیصلے کیے گئے۔

اے آر وائی نیوز کے مطابق پاکستان تحریک انصاف کے چیئرمین اور سابق وزیراعظم عمران خان کی زیر صدارت گزشتہ روز لاہور میں ان کی رہائشگاہ زمان پارک پر پارٹی کی مرکزی قیادت کا اجلاس ہوا جس میں فیصلہ کیا گیا کہ پی ٹی آئی کے اراکین پارلیمان مشترکہ طور پر سپریم کورٹ سے رجوع کریں گے اور حملے کی ایف آئی آر کے اندراج اور اس میں وزیراعظم شہباز شریف، رانا ثنا اللہ سمیت تین افراد کی نامزدگی کی استدعا کریں گے۔

اجلاس میں سینیئر قائدین کا حقیقی آزادی مارچ جاری رکھنے اور جمعرات سے وزیر آباد میں حملے کے مقام سے دوبارہ شروع کرنے کا فیصلہ کیا گیا، ملک کے دیگرحصوں سے قائدین قافلوں کی شکل میں راولپنڈی کی جانب بڑھیں گے اور ملک بھر سے قافلے نومبر کے تیسرے ہفتے راولپنڈی پہنچیں گے۔

اجلاس میں یہ بھی فیصلہ کیا گیا کہ تحریک انصاف کا ایک ہی بنیادی مطالبہ ہے کہ انتخابات جلد از جلد کرائے جائیں اور اس مطالبے سے کسی صورت پیچھے نہیں ہٹیں گے، زور دیا جائے گا کہ اسمبلیاں تحلیل اور چاروں صوبوں میں فوری انتخابات کی راہ ہموار کی جائے۔

اجلاس میں چیئرمین عمران خان کے حق میں متفقہ قرارداد بھی منظور کی گئی۔

اجلاس میں وزیر داخلہ پنجاب عمر سرفرازچیمہ نے حملے کی اب تک کی تحقیقات سے آگاہ کیا اور بتایا کہ ایک سے زائد حملہ آور تھے، گولیوں کے خول حاصل کر لیے گئے ہیں جب کہ جمع کیا گیا مواد اور کنٹینر کو محفوظ کرنے کے بعد فرانزک کیلیے بھیجا جا رہا ہے۔

عمر چیمہ نے مزید بتایا کہ تین اراکین پر مشتمل مشترکہ تحقیقاتی ٹیم آج تشکیل دے دی جائےگی اور مقامی پولیس کی جانب سے تحقیقات مشترکہ تحقیقاتی ٹیم کومہیا کی جائیں گی جس کے بعد تحقیقات کے حوالے سے معاملہ آگے بڑھے گا۔

Comments

- Advertisement -