اسلام آباد: ملک میں کو وِڈ 19 کی وبا کی دوسری لہر چل رہی ہے، وبا سے بچنے کے لیے حفاظتی اقدامات کے تحت تعلیمی ادارے بند ہوں گے یا نہیں، اس کا فیصلہ آج ہوگا۔
اے آر وائی نیوز کے مطابق تعلیمی اداروں سے متعلق اہم اجلاس آج ہوگا، جس میں اہم فیصلے متوقع ہیں، وزیر تعلیم شفقت محمود کی زیر صدارت بین الصوبائی وزرائے تعلیم کا اجلاس آج طلب کیا گیا تھا۔
اجلاس میں چاروں صوبوں، آزاد کشمیر، اور گلگت بلتستان کے وزرائے تعلیم ویڈیو لنک کے ذریعے شریک ہوں گے، اجلاس میں تعلیمی اداروں میں کرونا کیسز کاجائزہ لیا جائے گا، تعلیمی اداروں میں سردیوں کی چھٹیوں سے متعلق فیصلہ بھی متوقع ہے۔
ملک میں 24 گھنٹوں کے دوران کرونا وائرس کے 34 مریض جاں بحق
اجلاس میں اپریل سے اگست تک کے تعلیمی سال پرگفتگو ہوگی، آٹھویں کلاس کے بورڈ امتحانات سے متعلق بھی فیصلہ ہوگا، چند تجاویز زیر غور ہیں جن میں تعلیمی اداروں کو 24 نومبر سے 31 جنوری تک بند کرنا، 24 نومبر سے پرائمری اسکولز بند کرنا، 2 دسمبر سے مڈل اسکولز بند کرنا، تعلیمی سیشن کو 31 مئی تک بڑھانا شامل ہیں۔
مذکورہ تجاویز پر صوبوں کے ساتھ مشاورت کی جائے گی، اجلاس میں میٹرک اور انٹر میڈیٹ امتحانات 2021 کا فیصلہ بھی متوقع ہے، جب کہ اجلاس کے بعد فیصلوں سے متعلق شفقت محمود پریس کانفرنس کے ذریعے آگاہ کریں گے۔
