کوئٹہ:احتساب عدالت کوئٹہ نے میگا کرپشن کیس کا فیصلہ سنادیا ہے۔
تفصیلات کے مطابق کوئٹہ کی احتساب عدالت میں میگا کرپشن کیس کی سماعت ہوئی، احتساب عدالت ون کے جج منور شاہوانی نے اہم ترین کیس کی سماعت کی۔
عدالت نے شواہد کی روشنی میں میگا کرپشن کیس کے مرکزی ملزم سابق سیکرٹری خزانہ مشتاق رئیسانی کو دس سال قید کی سزا کا حکم سنایا اور مشتاق رئیسانی کی جائیدادیں ضبط کرنےکا بھی حکم دیا۔
احتساب عدالت کوئٹہ نے سابق مشیر خزانہ میر خالد لانگو کو دو سال دو ماہ قید کی سزا سنائی جبکہ کیس میں نامزد سابق سیکرٹریزلوکل گورنمنٹ فیصل جمال اور حافظ عبدالباسط کو عدم ثبوت کے باعث بری کردیا۔
میگا کرپشن اسکینڈل سنہ 2016 میں اس وقت سامنے آیا جب مشتاق رئیسانی کو ان کے دفتر سے گرفتار کیا گیا بعد ازاں ان کے گھر پر چھاپہ مار کارروائی کی گئی۔
چھاپے کے دوران مشتاق رئیسانی کے گھر سے 63 کروڑ روپے کی نقدی، کروڑوں روپے مالیت کے زیورات اور پرائز بانڈ برآمد ہوئے تھے۔
بعد ازاں قومی احتساب بیورو (نیب) نے صوبائی مشیر خزانہ خالد لانگو کو بھی حراست میں لے لیا تھا۔
