پی ٹی آئی رہنما شاہ محمود قریشی کی صاحبزادی مہر بانو کا کہنا ہے کہ بانی نے کہا تھا سائفر کیس منہ کے بل گرے گا۔

اے آر وائی نیوز کے مطابق مہربانو قریشی نے کہا کہ سائفر کیس کالعدم ہونے پر خوشی ہے، ابھی ہمیں انصاف کے لیے طویل جدوجہد کرنی ہے، اللہ کا شکر ہے، لوگوں کی دعائیں ہمارے ساتھ تھیں، سمجھ نہیں آرہا فیصلے پر کس طرح اظہار کریں۔

انہوں نے کہا کہ ہم سب نے تکالیف بھی دیکھی ہیں، شاہ محمود قریشی 9 مئی کے کیسز میں پانچ جون تک ریمانڈ پر ہیں، ان کی روبکار آج جاری نہیں ہوسکتی۔

مہربانو قریشی نے کہا کہ یاد رکھیں کہ سائفر کو کہا جاتا تھا کہ یہ تمام کیسز میں سب سے سنگین ہے لیکن اس کیس میں آج وہی ہوا کھودا پہاڑ نکلا چوہا۔

دوسری جانب زین قریشی نے کہا کہ 9 مئی کے کیسز کی حقیقت یہ ہے کہ شاہ محمود قریشی کراچی میں تھے، ان کیسز میں ان کی موجودگی کہیں بھی ثابت نہیں ہے۔

واضح رہے کہ اسلام آباد ہائی کورٹ نے سائفر کیس کا فیصلہ سناتے ہوئے بانی پی ٹی آئی اور شاہ محمود قریشی کی سزا کالعدم قرار دے دی۔