لاہور: بنگلا دیش کے خلاف ٹیسٹ سیریز کھیلنے کیلئے قومی اسکواڈ میں شامل کھلاڑی ڈھاکہ روانہ ہوگئے۔
تفصیلات کے مطابق پاکستان کی ٹیسٹ کرکٹ ٹیم میں شامل کھلاڑی بنگلا دیش کے خلاف دو ٹیسٹ میچز کی سیریز کے لیے ڈھاکہ روانہ ہوگئے ہیں۔
پاکستان کرکٹ بورڈ نے ٹوئٹر اکاؤنٹ پر کھلاڑیوں کی روانگی کی تصویر شیئر کی، جن میں اوپننگ بیٹر امام الحق، بیٹر اظہر علی اور آل راؤنڈر فہیم اشرف کو دیکھا جاسکتا ہے۔
یہ بھی پڑھیں: شاہین شاہ آفریدی نے معافی مانگ لی، ویڈیو دیکھیں
قومی ٹیسٹ اسکواڈ کے ارکان ڈھاکہ پہنچنے کے بعد ایک روز آئسولیشن میں رہیں گے اور آئسولیشن مکمل کرنے کے بعد اسکواڈ کے دیگر ارکان کو جوائن کریں گے۔
پاکستان اور بنگلا دیش کے درمیان دو ٹیسٹ میچز کی سیریز کھیلی جائے گی، سیریز کا پہلا ٹیسٹ 26 نومبر سے چٹاگانگ میں شروع ہو گا، سیریز کا دوسرا میچ ڈھاکہ میں چار دسمبر سے کھیلا جائے گا۔
