اے آر وائی ڈیجیٹل کے ڈرامہ سیریل ’میرے ہی رہنا‘ میں اسد نے اہلیہ روحی کو تھپڑ مار دیا۔
ڈرامہ سیریل ’میرے ہی رہنا‘ میں شہروز سبزواری (اسد)، کرن حق (روحی)، سید جبران (جنید)، اریج محی الدین (بینا)، عروبا مرزا (انو)، بابر علی (ابی)، فیضان شیخ، سبحان اعوان (عمر)، ندا ممتاز، پروین اکبر ودیگر اداکاری کے جوہر دکھا رہے ہیں۔
ڈرامے کی ہدایت کاری کے فرائض ذیشان علی زیدی نے انجام دیے ہیں جبکہ اس کی کہانی میمونہ عزیز نے لکھی ہے۔
’میرے ہی رہنا‘ کی کہانی دو بہنوں روحی اور بینا کے گرد گھومتی ہے جس میں دکھایا گیا ہے ایک ہی گھر میں شادی ہونے کے بعد دونوں بہنوں کو کن مسائل کا سامنا کرنا پڑتا ہے۔
گزشتہ قسط میں دکھایا گیا کہ ’روحی، نند انو کی چالاکیوں کو سمجھ کر انہیں برا بھلا کہہ رہی ہوتی ہیں اسی دوران اسد آجاتے ہیں اور روحی کو تھپڑ مار دیتے ہیں۔‘
روحی نند انو سے کہتی ہیں کہ ’آپ کی وجہ سے ہم دونوں بہنیں دیورانی جیٹھانی بند کر کھڑی ہیں، یہ جو کچھ بھی ہورہا ہے اس کے پیچھے آپ ہی کا تو ہاتھ ہے۔‘
انو، بھائی اسد کو پیچھے کھڑا دیکھ کر فوراً معصوم بن جاتی ہیں اور کہتی ہیں کہ ’یہ کیا کہہ رہی ہو؟‘
روحی کہتی ہیں کہ ’اتنی معصوم نہ بنیں آپ کی حقیقت کو میں اچھی طرح سے جانتی ہوں اور یہ بھی کہ جتنی معصوم آپ لگتی ہیں اس سے کئی زیادہ چالاک اور شاطر ہیں۔‘
’یہ سن کر اسد اہلیہ روحی کو تھپڑ مار دیتے ہیں۔‘ انو پھر بھائی سے کہتی ہیں کہ ’اسد تمہارا دماغ تو ٹھیک ہے ایسے بیوی پر کون ہاتھ اٹھاتا ہے۔‘
انو ناٹک کرتے ہوئے کہتی ہیں کہ ’امی نے ہماری یہ تربیت کی ہے کہ تم غصے کی حالت میں اچھے اور برے کا فرق بھول جاؤ۔‘ اسد پھر بہن سے معافی مانگ لیتے ہیں۔‘
وہ کہتی ہیں کہ ’معافی مجھ سے نہیں روحی سے مانگو، تم نے اس کے ساتھ بہت زیادتی کی ہے۔‘ اسد کہتے ہیں کہ مجھ سے برداشت نہیں ہوا، وہ جس طرح تمہارے ساتھ بدتمیزی کررہی تھی مجھے غصہ آگیا۔‘
کیا انو، بینا اور روحی کو اسی طرح تنگ کرتی رہیں گی؟ یہ جاننے کے لیے ’میرے ہی رہنا‘ کی اگلی قسط دیکھیں۔
