کراچی : اے آر وائی ڈیجیٹل کے مقبول ترین ڈرامہ سیریل ’میرے پاس تم ہو‘ نے ریٹنگ میں گیمز آف تھرونز کو بھی پیچھے چھوڑ دیا۔
تفصیلات کے مطابق اے آر وائی ڈیجیٹل کے مقبول ترین ڈراما سیریل ”میرے پاس تم ہو“ ہر قسط کے ساتھ ایک نیا ریکارڈ بناتا جارہا ہے، صارفین ہر ہفتے شدت سے ڈرامے کی اگلی قسط نشر ہونے کا انتظار کرتے ہیں جبکہ ہر نئی قسط کے ساتھ یہ ڈراما دیگر ڈراموں کو پیچھے چھوڑتے ہوئے ٹی آر پی (ٹیلی ویژن ریٹنگ پوائنٹ) کے نئے قائم کررہا ہے اس کے علاوہ یوٹیوب پر بھی اس ڈرامے نے طوفان مچایا ہوا ہے۔
گوگل کے مطابق ڈراما سیریل ”میرے پاس تم ہو“ نے آئی ایم ڈی بی (انٹرنیٹ مووی ڈیٹا بیس) پر دنیا بھر میں مقبول ترین ٹی وی سیریز ”گیم آف تھرونز“ کو بھی پیچھے چھوڑدیا ہے لیکن کیا واقعی یہ سچ ہے۔
آئی ایم ڈی بی ایک آن لائن ڈیٹا بیس یعنی اعدادوشمار اور درجہ بندی کی ویب سائٹ ہے جو دنیا بھرسے فلموں، ڈراموں، ویڈیوز اور گیمز وغیرہ کے اعداد و شمار اور ریٹنگ جاری کرتی ہے، دنیا بھر میں آئی ایم ڈی بی کی ریٹنگ کو نہایت معتبر مانا جاتا ہے۔
سرچ انجن گوگل کے مطابق ڈراما سیریل ”میرے پاس تم ہو“ کی ریٹنگ آئی ایم ڈی بی پر 10 میں 9.9 اور”گیم آف تھرونز کی 10 میں سے 9.4 ہے تاہم گوگل کے برعکس آئی ایم ڈی بی کی ویب سائٹ پر ڈراما سیریل ”میرے پاس تم ہو“ کی ریٹنگ 9.9 کے بجائے7.7 آرہی ہے۔
واضح رہے کہ آئی ایم ڈی بی کی درجہ بندی کا نظام اس کے رجسٹرڈ صارفین کی جانب سے کاسٹ کیے جانے والے ہر انفرادی ووٹ کے تحت ہوتا ہے۔
مزید پڑھیں : ’تھپڑ کھانے کے بعد عائزہ خان کا ردعمل آگیا‘
ڈراما سیریل ”میرے پاس تم ہو“ کی اب تک 17 قسطیں نشر ہوچکی ہیں اورہر قسط کو ناظرین کی جانب سے زبردست پذیرائی مل رہی ہے۔
یاد رہے کہ ڈرامہ سیریل میرے پاس تم ہو شاندار کہانی، عدنان صدیقی، عائزہ خان اور ہمایوں سعید کی جاندار اداکاری کی بدولت شہرت کی بلندیوں کو چھو رہا ہے، مداح ہفتے کی رات 8 بجے ڈرامہ دیکھنے کے لیے بے صبری سے انتظار کرتے ہیں۔
