لاہور: آج شام سیارہ عطارد سورج کے عین سامنے سے گزرے گا، پاکستان میں منفرد نظارہ صرف کراچی اور زیریں سندھ میں دیکھا جاسکے گا۔
تفصیلات کے مطابق کراچی میں نظام شمسی کا سیارہ عطارد آج سورج کے سامنے سے گزرے گا اور دنیا کے کئی ممالک میں ٹیلی اسکوپ کے ذریعے عطارد کے اس سفر کا مشاہدہ ممکن ہوگا۔
پاکستان میں کراچی اور زیریں سندھ میں سیارہ چند منٹوں کے لیے نمودار ہوگا۔ جامعہ کراچی میں حالیہ نصب کی جانے والی 16 انچ میڈ دوربین کے ذریعے صحافیوں، طلبہ وطالبات اور عام افراد کو یہ منظر دیکھنے کی دعوت دی گئی ہے۔
سیارہ عطارد نقطے کی صورت میں سامنے آئے گا۔ یہ واقعہ اگلی مرتبہ 13 سال بعد 2032ء میں نمودار ہوگا کیونکہ ایک صدی میں ایسا 13 مرتبہ ہی ہوتا ہے۔
اس سے قبل جون 2012ء میں زہرہ سیارہ سورج کے سامنے سے گزرا تھا اور اسے دیکھنے کے لیے جامعہ کراچی سمیت کئی اداروں نے خصوصی انتظامات کیے تھے۔
واضح رہے کہ عطارد سورج کے گرد بہت تیزی سے گزرتا ہے لیکن اکثر اوقات اس کے مدار کی سطح زمین کی سیدھ میں نہیں ہوتی یا تو وہ سورج کے پس منظر میں اوپر ہوتا ہے یا پھر نیچے سے گزر جاتا ہے لیکن یہ ایک خاص لمحہ ہے جب ہماری زمین، عطارد اور سورج ایک ہی سیدھ میں ہیں۔
