پاکستان تحریک انصاف کے چیئرمین اور رکن قومی اسمبلی نے بانی پی ٹی آئی کو مذاکرات کے حوالے سے پیغام سے متعلق دوٹوک جواب دیا ہے۔
اے آر وائی نیوز کے مطابق پاکستان تحریک انصاف کے چیئرمین اور رکن قومی اسمبلی بیرسٹر گوہر نے اسلام آباد میں میڈیا سے گفتگو کرتے ہوئے واضح کیا ہے کہ مذاکرات کیلیے بانی پی ٹی آئی کے پاس کوئی پیغام آیا اور نہ ہمارے پاس۔ اگر ایسا کوئی پیغام آیا تو سب کو کھلے عام اطلاع دیں گے۔
بیرسٹر گوہر نے کہا کہ عوام کے ووٹ کی قدر ہونی چاہیے، شفاف انتخابات ہونے چاہئیں اور آر ٹی ایس نہیں بیٹھنا چاہیے۔ ہم الیکشن کے نام پر ڈرامے کی مذمت کرتے ہیں، عوام اپنے حقوق کے لیے آواز اٹھائیں۔ ان شا اللہ وہ وقت بھی آئے گا جب عوام کے حق رائے دہی کا درست استعمال ہوگا اور جمہوریت مضبوط ہوگی۔
ان کا کہنا تھا کہ بانی پی ٹی آئی نے کہا ہے وکلا کا کنونشن کریں، ہم نے رول آف لا کو ہاتھ سے جانے نہیں دینا، جمعے کو تحریک انصاف کا احتجاج ہوگا۔ احتجاج کے دوران پاکستان اور پی ٹی آئی کا جھنڈا ہاتھ میں ہونا چاہیے۔ ہم مزاحمت نہیں بلکہ اپنے حقوق کے لیے لڑ رہے ہیں اور لڑتے رہیں گے، ہم اپنے خلاف سیاسی کیسز ختم کرنے کے لیے کوشاں ہیں۔
چیئرمین پی ٹی آئی نے کہا بشریٰ بی بی کی کی صحت کے بارے میں خدشات کا اظہار کیا گیا ہے، ہمیں جانے نہیں دیا جا رہا، ہمیں لگ رہا ہے ان کی طبیعت زیادہ خراب ہو رہی ہے۔ ان صحت اور سیکیورٹی کے ذمہ دار وہ لوگ ہیں جن کی کسٹڈی میں بی بی ہیں۔
بشریٰ بی بی کا رات گئے بنی گالہ میں طبی معائنہ، ڈاکٹرز نے کیا کہا؟
بیرسٹر گوہر نے یہ بھی کہا کہ بانی پی ٹی آئی کہتے ہیں بشریٰ بی بی کا توشہ خانہ کیس سے دور دور تک تعلق نہیں۔ انہیں 14 سال کی سزا دینا، بدنام کرنا بانی پی ٹی آئی پر دباؤ ڈالنا ہے۔
انہوں نے مزید کہا کہ اس وقت بانی پی ٹی آئی کے سوا کسی کا جیل ٹرائل نہیں ہورہا۔ ہم آئین اور قانون کی بات کرتے ہیں کہ جیل میں ٹرائل نہیں ہو سکتا۔ القادر ٹرسٹ کیس میں ایسی کونسی چیز ہے جو چھپا رہے ہیں۔
