کراچی : محکمہ موسمیات نے کراچی میں 13 اور 14اپریل کو تیز بارش کی پیش گوئی کردی ، اس حوالے سے پی ڈی ایم اے نے الرٹ جاری کردیا ہے۔
تفصیلات کے مطابق کراچی سمیت سندھ کے بیشترمقامات پرگرمی بڑھنے لگی، کراچی میں آج درجہ حرارت سینتیس سے اڑتیس ڈگری سینٹی گریڈ رہنے کا امکان ہے جبکہ نواب شاہ میں پارہ پینتالیس، بےنظیرآباد میں چوالیس اورسکھرمیں تینتالیس ڈگری تک جاسکتاہے۔
محکمہ موسمیات کا کہنا ہے کہ دس اپریل سے مغربی ہوائیں ملک کے بیشترمقامات پربارش کا باعث بنیں گی، جس سے آندھی اورگرج چمک کےساتھ بارش اورکہیں کہیں ژالہ باری بھی متوقع ہے۔
محکمہ موسمیات نے بتایا کہ سندھ میں بارشوں کا سلسلہ 10 سے 15 اپریل تک جاری رہے گا، کراچی میں 13 اور 14 اپریل کو تیز بارش کا امکان ہے۔
اس حوالے سے پی ڈی ایم اے نےالرٹ جاری کردیا، جس میں ڈپٹی کمشنرزکواقدامات کی ہدایات جاری کی گئی ہے۔
پی ڈی ایم اے کا کہنا ہے کہ کراچی،حیدرآباد،جامشورو،دادو،سکھر،جیکب آباد ، کشمور،لاڑکانہ،قمبر،شہدادکوٹ اورسانگھڑ میں بارش کاامکان ہے، 10 سے 15 اپریل تک آندھی اور گرج چمک کیساتھ بارش کی پیش گوئی ہے۔
پی ڈی ایم اے نے الرٹ میں کہا ہے کہ متعلقہ حکام ضروری احتیاطی تدابیراختیارکریں، بارش کےدوران ڈی واٹرنگ مشینوں اورعملےکی دستیابی کویقینی بنائیں، ہنگامی خدمات کےساتھ کوآرڈینیشن کوبہتربنائیں۔
الرٹ میں کہنا تھا کہ متاثرین کی ضروریات کوترجیحی بنیاد پرپوراکرنےکیلئےہیلپ لائن سیل قائم کیاجائے اور اسپتالوں میں اسٹینڈبائی جنریٹرزکی دستیابی کویقینی بنایاجائے۔
