The news is by your side.

Advertisement

محکمہ موسمیات کی پیشگوئی ، کراچی والے ہوشیار ہوجائیں

کراچی : محکمہ موسمیات نے کراچی میں آج دوپہر سے تیزہوائیں چلنے کی پیشگوئی کرتے ہوئے کہا ہے کہ سرد ہوائیں چلنے کے باعث سردی کی شدت میں اضافہ ہوگا۔

تفصیلات کے مطابق محکمہ موسمیات کی جانب سے بیان میں کہا گیا ہے کہ کراچی میں آج شام سے سرد ہوائیں چلیں گی، سرد ہوائیں چلنے کے باعث سردی کی شدت میں اضافہ ہوگا۔

چیف میٹرولوجسٹ سردارسرفراز کا کہنا تھا کہ بلوچستان کی جانب سے 2 دن تک ٹھنڈی ہوا چلے گی ، ہوائیں 25 سے 30 ناٹیکل مائل کی رفتار سے چل سکتی ہیں، تیزہواؤں میں بل بورڈز اور درخت گرنے کا خدشہ ہوتا ہے، اس لئے تیزہواؤں کےدوران پرانے درختوں اور بل بورڈز کے پاس نہ کھڑےہوں۔

سردارسرفراز نے بتایا کہ کراچی میں 3اور 4 فروری کو درجہ حرارت12 سے 13ڈگری سینٹی گریڈ متوقع ہے۔

چیف میٹرولوجسٹ کا کہنا ہے کہ کوئٹہ،مکران کی ساحلی پٹی، گوادر،کیچ،آوران،لسبیلہ میں آندھی اورجھکڑ چلنے کا امکان ہے جبکہ پنجگور، خضدار، کوئٹہ،ژ وب، نوکنڈی، دالبندین اورقلات میں بھی آندھی متوقع ہے۔

محکمہ موسمیات کے مطابق بلوچستان کے ساحلی علاقوں میں ہواکی رفتار 30سے35ناٹیکل مائل ہوسکتی ہے، ماہی گیر سمندر میں جانے سے گریز کریں،

کمشنر کراچی محمداقبال میمن نے محکمہ موسمیات کی پیش گوئی کے پیش نظر ضلعی انتظامیہ کو تیزہواؤں سے متعلق تیاری کی ہدایت کرتے ہوئے کہا غیرقانونی بل بورڈ کو ہٹایا جارہا ہے۔

دوسری جانب این ڈی ایم اے نے آج اور کل ملک میں موسم کی ممکنہ خرابی کے پیش نظر الرٹ جاری کیا ہے، محکمہ موسمیات کی جانب سے ملک کے بالائی اور وسطیٰ علاقوں میں آندھی، بارش اور برفباری کی پیشگوئی کی گئی ہے۔

این ڈی ایم اے نے صوبائی اور ضلعی انتظامیہ کو ہنگامی صورتحال سے نمٹنے کے لیے بروقت اور پیشگی اقدامات، راستے بند ہونے پرضروری مشینری اور عملے کی دستیابی یقینی بنانے کی ہدایت کی ہے۔

این ڈی ایم اے نے ماہی گیروں کو بھی احتیاطی طور پر گہرے پانی میں جانے میں گریز کا مشورہ دیا جبکہ ممکنہ سیلابی صورتحال سے نمٹنے کے لیے مقامی انتظامیہ کے ساتھ رابطے میں رہتے ہوئے ضرور ی اقدامات کرنے کا حکم بھی دیا گیا ہے۔

Comments

یہ بھی پڑھیں