اسلام آباد : محکمہ موسمیات نے کل سے 6 اگست تک طوفانی بارشوں کی پیش گوئی کردی اور تمام متعلقہ اداروں کو الرٹ رہنے کی ہدایت کردی۔
تفصیلات کے مطابق محکمہ موسمیات نے یکم اگست سے چھ اگست تک ملک میں شدید مون سون بارشوں کی پیشگوئی کردی۔
31 جولائی سے 6 اگست تک کشمیر، مظفر آباد میں تیز ہواؤں اور گرج چمک کے ساتھ موسلا دھار بارش کئی مقامات پر ژالہ باری بھی متوقع ہے جبکہ یکم اگست سے 6 اگست تک پنجاب اسلام آباد سرگودھا سمیت مختلف علاقوں میں گرج چمک کے ساتھ بارش اور کئی مقامات پر طوفانی بارش بھی متوقع ہے۔
محکمہ موسمیات کا کہنا ہے کہ 2 اگست سے 6 اگست کے دوران بہاولپور بہاول نگر ڈیرہ غازی خان میں تیز ہوا گرج چمک کے ساتھ موسلا دھار بارشیں جبکہ 1 اگست سے 6 اگست تک چترال، دیر، سوات، صوابی میں گرج چمک کے ساتھ موسلا دھار بارشوں کی توقع ہے۔
بلوچستان کے مشرقی علاقوں میں گرج چمک کے ساتھ بارش کا امکان ہے جبکہ سندھ میں 2 اگست سے 6 اگست تک مٹھی، عمر کوٹ، ٹھٹھہ، بدین میں گرج چمک کے ساتھ موسلا دھار بارش متوقع ہے۔
3 اگست سے 6 اگست تک کشمیر گلگت بلتستان میں شدید بارشوں کی توقع ہے، 2 سے 5 اگست کے درمیان موسلادھار بارش سے اسلام آباد، راولپنڈی سمیت مختلف علاقوں میں پہاڑوں اور ندی نالوں میں سیلابی صورتحال پیدا ہونے کا خدشہ ہے۔
2 اگست سے پانچ اگست تک سیالکوٹ گجرانوالہ نارووال میں اربن فلڈنگ جبکہ خیبر پختونخوا کے پہاڑی علاقوں مری، گلیات بلوچستان میں لینڈ سلائیڈنگ کے باعث ٹریفک کی آمد و رفت متاثر ہونے کا خدشہ ہے۔
مون سون بارشوں کے باعث روز مرہ کی معمولات متاثر ہونے کمزور انفراسٹرکچر کو نقصان پہنچنے کا خدشہ ظاہر کرتے ہوئے تمام متعلقہ اداروں کو الرٹ رہنے کی ہدایت کردی ہے۔
