ریاض: سعودی محکمہ موسمیات نے آج سے مملکت کے مختلف علاقوں میں بارش کی پیش گوئی کردی۔
عرب میڈیا کی رپورٹ کے مطابق سعودی عرب میں کہیں تیز اور کہیں ہلکی بارشوں کے پیش نظر محکمہ ٹریفک نے شہریوں کو متنبہ کیا ہے کہ وہ سیلابی ریلوں سے اپنی گاڑیوں کو دور رکھیں۔
سعودی محکمہ ٹریفک کا کہنا ہے کہ اکثر ڈرائیورز کرتب کے طور پر سیلابی ریلوں میں اپنی گاڑیاں دوڑا کر پار کرنے کی کوشش کرتے ہیں، یہ کوشش کئی مرتبہ جان لیوا بھی ثابت ہوئی۔
محکمہ ٹریفک نے شہریوں کو خبردار کیا کہ ایسا کرنے پر 10 ہزار ریال تک جرمانہ ہوسکتا ہے۔
یہ بھی کہا گیا کہ جرمانے کی کم سے کم حد 5ہزار ریال ہے جبکہ خلاف ورزی کی نوعیت کو دیکھتے ہوئے اسے 10 ہزار ریال تک بھی کیا جاسکتا ہے۔
خیال رہے کہ سعودی عرب میں دیہی اور نشیبی علاقوں میں بعض نوجوان شدید سیلابی ریلوں کو گاڑیوں سے عبور کرنا باعث فخر سمجھتے ہیں۔ ایسا کرنے پر اس سے قبل متعدد افراد ہلاک ہوچکے ہیں۔
