لاہور : وزیراطلاعات پنجاب میاں اسلم اقبال نے کہا ہے کہ بے مقصد دھرنوں کی سیاست اب نہیں چلے گی، مولانا پاکستان لوٹنے والوں کے سرپرست کا کردار ادا کررہے ہیں۔
ان خیالات کا اظہار انہوں نے اپنے حلقے سے ملاقات کیلئے آنے والے علاقہ معززین سے گفتگو کرتے ہوئے کیا، انہوں نے کہا کہ مولانا فضل الرحمان ملکی معیشت اور سیاسی استحکام کو تباہ کرنا چاہتے ہیں۔
انہوں نے کہا کہ حکومت کسی کو بھی اداروں کے خلاف بدزبانی کی اجازت نہیں دے گی، مولانا پاکستان لوٹنے والوں کے سرپرست کا کردار ادا کررہے ہیں۔
وزیراطلاعات پنجاب نے کہا کہ مولانا فضل الرحمان جتھوں کے ذریعے حکومت اور ریاست کو بلیک میل کرناچاہتے ہیں، مدرسوں کے چند ہزاربچوں سے اسلام آباد کو یرغمال نہیں بنایا جاسکتا، بے مقصد دھرنوں کی سیاست اب نہیں چلے گی، پیپلز پارٹی اور ن لیگ عملاً دھرنے سے لاتعلق ہو چکی ہے۔
میاں اسلم اقبال نے کہا کہ پی ٹی آئی حکومت کا ایجنڈا صرف پاکستان اور عوام کی ترقی ہے، ملکی اورعوام کی ترقی پر کسی صورت سمجھوتہ نہیں کیا جائے گا۔
