میانوالی : پنجاب کے شہر میانوالی میں پولیس نے دہشت گردوں کی جانب سے تھانہ مکڑوال پر کیا جانے والاحملہ ناکام بنا دیا، واقعے کی تحقیقات کیلئے آئی جی پنجاب نے خصوصی ٹیم تشکیل دے دی۔
اس حوالے سے ڈی پی او میانوالی محمد نوید نے میڈیا کو بتایا کہ تھانہ مکڑوال پر15سے20دہشت گردوں نےحملہ کیا تاہم حملے میں تمام اہلکار محفوظ رہے۔
ڈی پی اومیانوالی کے مطابق دہشت گردوں نے حملے میں جدید آتشیں اسلحے کا استعمال کیا، پولیس کی جوابی فائرنگ سے چند دہشت گرد زخمی بھی ہوئے۔
دہشت گرد اپنے زخمی ساتھیوں کو لےکر فرار ہونے میں کامیاب ہوگئے، واقعے کے بعد پولیس نے تمام علاقے کو گھیرےمیں لے کرسرچ آپریشن کا آغاز کردیا ہے۔
خصوصی ٹیم تشکیل
واقعے کے بعد آئی جی پنجاب ڈاکٹرعثمان انور نے میانوالی میں تھانے پر حملے کے پیش نظر خصوصی ٹیم تشکیل دیدی ہے، 4رکنی ٹیم میں ایڈیشنل آئی جی ٹریننگ،اسپیشل برانچ،آپریشنز اور ڈی آئی جی آئی ٹی شامل ہیں۔
مذکورہ کمیٹی آرپی او سرگودھا سے مل کر دہشت گردوں کیخلاف سرچ و کومبنگ آپریشنز پلان کرے گی، آئی جی پنجاب کی تھانہ مکڑوال اور ملحقہ علاقوں میں سرچ و کومبنگ آپریشنزکی ہدایت دی گئی ہے۔
آئی جی پنجاب ڈاکٹرعثمان انور کا کہنا ہے کہ ایجنسیوں کے ساتھ مل کر میانوالی میں بھرپور سرچ آپریشن کئےجائیں، دہشت گردوں اور سہولت کاروں کو زیروٹالرنس کے تحت کیفرکردار تک پہنچایا جائے۔
