لندن: برطانیہ اور یورپی یونین کے مابین بریگزٹ مذاکرات نتیجہ خیز ثابت نہ ہو سکے۔
غیر ملکی میڈیا کے مطابق یورپی یونین اور برطانیہ کے درمیان تجارت اور مستقبل کے تعلقات کو شکل دینے والے معاہدے بریگزٹ سے متعلق مذاکرات میں اتفاق رائے نہ ہو سکا۔
اس سلسلے میں آج برطانوی وزیر اعظم بورس جانسن اور یورپی یونین کمیشن کے سربراہ اُرسلا وون دی لیین موجودہ پیش رفت پر اپنے جائزے پیش کریں گے۔
بریگزٹ کے مذاکرات کار مشل بارنیئر نے ٹویٹر پر اپنے ایک پیغام میں لندن میں ایک ہفتے سے جاری وسیع سطح کے مذاکرات کے حوالے سے بتایا کہ فریقین میں منصفانہ تقسیم، گورننس اور فشریز کے معاملات میں نمایاں اختلاف کے سبب مذاکرات نتیجہ خیز ثابت نہ ہو سکے۔
After one week of intense negotiations in London, together with @DavidGHFrost, we agreed today that the conditions for an agreement are not met, due to significant divergences on level playing field, governance and fisheries.
— Michel Barnier (@MichelBarnier) December 4, 2020
مشل بارنیئر نے کہا کہ بریگزٹ امور کے مذاکرات کار ڈیو فراسٹ کے ساتھ وہ فی الوقت مذاکرات کے سلسلے کو روکنے پر رضامند ہو گئے ہیں، مذاکرات سے متعلق اب حکام بالا کو بریفنگ دی جائے گی۔
یاد رہے کہ یورپی یونین سے 31 جنوری 2020 سے علیحدگی اختیار کرنے والے برطانیہ اور یونین کے مابین تجارتی اور دو طرفہ تعلقات پر وسیع پیمانے پر مذاکرات ہو رہے ہیں۔
ان مذاکرات کے دوران اگر کسی نتیجے تک نہ پہنچا گیا تو فریقین تجارتی تعلقات کو 31 دسمبر کے بعد عالمی تجارتی تنظیم کے اصولوں کے مطابق سر انجام دیں گے۔
