ابو ظہبی: متحدہ عرب امارات میں گرمی کی شدت میں اضافے کے ساتھ دوپہر کے اوقات میں مزدوروں کے دھوپ میں کام کرنے پر پابندی عائد کردی گئی۔
مقامی میڈیا رپورٹ کے مطابق متحدہ عرب امارات کی وزارت افرادی قوت کا کہنا ہے کہ 15 جون سے 15 ستمبر 2022 تک دوپہر ساڑھے بارہ بجے سے سہ پہر 3 بجے تک کھلے مقامات پر دھوپ میں کسی بھی کارکن سے ڈیوٹی نہیں لی جاسکتی، اس پر پابندی ہے۔
وزارت کے ڈپٹی سیکریٹری محسن النسی کا کہنا تھا کہ امارات میں دوپہر کے وقت کھلے مقامات پر دھوپ میں ڈیوٹی پر پابندی کا سلسلہ 17 برس پہلے شروع کیا گیا تھا۔
انہوں نے کہا کہ پابندی انسانی بنیادوں پر ہے، موسم گرما میں سخت درجہ حرارت کے باعث کارکنان کے لیے کھلے مقاامات پر دھوپ میں کام کرنا بے حد مشکل ہوتا ہے۔
ڈپٹی سیکریٹری کا کہنا تھا کہ موسم گرما میں دوپہر کے وقت کھلے مقامات پر ڈیوٹی پر پابندی امارات میں لیبر مارکیٹ کی انفرادیت بن چکی ہے، برسوں سے اس پابندی پر سختی سے عمل کیا جا رہا ہے۔
وزارت افرادی قوت کا مزید کہنا تھا کہ اگر کسی شخص کے مشاہدے میں اس پابندی کی خلاف ورزی آئے تو اس کی رپورٹ کروائی جا سکتی ہے۔
