واشنگٹن: امریکی صدر ڈونلڈ ٹرمپ نے میکسیکو کے تارکین وطن پر آنسو گیس کی شیلنگ کا دفاع کرتے ہوئے کہا ہے کہ صرف وہی لوگ امریکی سرحد پار کرسکیں گے جو قانونی تقاضوں پر پورا اتریں گے۔
غیرملکی خبررساں ادارے کے مطابق بچوں کے متاثر ہونے کے سوال پر صدر ٹرمپ نے ذمہ داری والدین پر ڈالتے ہوئے کہا کہ وہ نہ جانے کیوں بچوں کو آنسو گیس والے علاقے میں لائے، تارکین وطن پر آنسو گیس کی ایک محفوظ مقدار استعمال کی گئی۔
امریکی صدر نے الزام عائد کیا کہ اکثر تارکین وطن بچوں کے حقیقی والدین نہیں تھے اور بچوں کو ساتھ لاکر پناہ حاصل کرنا چاہتے تھے، تاہم وہ اس بات کا کوئی ثبوت نہ دے سکے۔
صدر ٹرمپ مڈٹرم انتخابات میں بھی اصرار کرتے رہے ہیں کہ میکسیکو سے آنے والوں کی اکثریت غیر شادی شدہ مردوں پر مشتمل ہے، تارکین وطن میں خطرناک جرائم پیشہ افراد بھی شامل ہوتے ہیں۔
مزید پڑھیں: ٹرمپ کی میکسیکو کی سرحد پر تارکین وطن کو گولی مارنے کی دھمکی
ڈونلڈ ٹرمپ کی مخالف ڈیموکریٹک پارٹی پارٹی نے واقعے پر شدید ردعمل کا اظہار کیا ہے، ایک پارٹی عہدیدار نے کہا کہ ننگے پاؤں بچوں پر آنسو گیس کی شیلنگ کرنے والا ان کا امریکا نہیں ہوسکتا۔
امریکن کسٹمز اور بارڈر کمشنر کیون مک الینان نے کہا ہے کہ میکسیکو حکام کی جانب سے روکے جانے پر تارکین وطن ٹولیوں میں بٹ گئے اور مختلف مقامات سے سرحد پار کرنے کی کوشش کرتے رہے جس کے جواب میں آنسو گیس کا استعمال کیا گیا۔
بارڈر کمشنر کے مطابق طاقت کے استعمال کا فیصلہ حالات کے پیش نظر اہلکاروں نے ذاتی حیثیت میں کیا، چار امریکی اہلکاروں کو پتھر لگے لیکن کسی کے زخمی ہونے کی اطلاع نہیں ہے۔
