The news is by your side.

Advertisement

لیبیا: کشتی میں سوار 10 تارکین وطن دم گھٹنے سے ہلاک

لیبیا کے ساحل سے تارکین وطن کو لے جانے والی ایک کشتی میں 10 افراد دم گھٹنے سے ہلاک ہوگئے، کشتی میں ضرورت سے زیادہ افراد کو سوار کیا گیا تھا۔

بین الاقوامی ویب سائٹ کے مطابق لیبیا کے ساحل سے تارکین وطن کو لے جانے والی ایک کشتی میں دس افراد مردہ پائے گئے، خیال کیا جا رہا ہے کہ اس کشتی میں بہت زیادہ افراد سوارکیے جانے کے باعث دم گھٹنے سے ان افراد کی موت ہوئی ہے۔

ڈاکٹرز ود آؤٹ بارڈرز نامی ادارے نے مطلع کیا ہے کہ ایک ریسکیو بحری جہاز جیو بیرنٹس کی طرف سے کارروائی کرتے ہوئے کشتی میں سوار 99 تارکین کو بچالیا گیا ہے۔

ادارے نے اپنے ایک ٹویٹ میں بتایا ہے کہ گنجائش سے زیادہ افراد سے بھری اس کشتی کے نچلے حصے میں 10 افراد مردہ پائے گئے۔

مزید وضاحت کرتے ہوئے فرانسیسی ادارے کا کہنا ہے کہ سمندر میں روانہ ہونے والی کشتی میں ضرورت سے زیادہ افراد کو سوار کیا گیا اور 13 گھنٹے گزرنے کے بعد 10 افراد دم گھٹنے کے باعث ہلاک ہو گئے۔

واضح رہے کہ ہر سال ہزاروں افراد غیر قانونی طور پر لیبیا اور تیونس سے نکل کر وسطی بحیرہ روم کے راستے یورپ اور اکثر اٹلی میں داخل ہونے کی کوشش کرتے ہیں۔

اقوام متحدہ کی مائیگریشن ایجنسی آئی او ایم کے ایک عہدیدار کا کہنا ہے کہ یہ سمندری راستہ انتہائی جان لیوا ہے اور رواں سال اب تک وسطی بحیرہ روم میں 12 سو 36 افراد ہلاک ہو چکے ہیں جبکہ گزشتہ سال کے اعداد وشمار کے مطابق 858 ہلاکتیں ریکارڈ کی گئی تھیں۔

Comments

یہ بھی پڑھیں