کابل: افغان طالبان نے امریکی فوجی گاڑیاں ایران کے حوالے کردیں، اس حوالے سے سوشل میڈیا پر ایک ویڈیو کلپ بھی پوسٹ کیا گیا ہے۔
بین الاقوامی ویب سائٹ کے مطابق افغان طالبان نے امریکی فوجی گاڑیاں ایران کے حوالے کردیں، طالبان کی جانب سے ایرانی حکام کو امریکی فوجی گاڑیوں کی فراہمی کے بعد قافلے کو تہران کی جانب جاتے ہوئے فلمایا گیا۔
دفاع اور سیکیورٹی کے امور کے ماہر جوناتھن کٹسن کا کہنا ہے کہ ان گاڑیوں کا نقصان امریکا کے لیے ایک اور شرمندگی ہے، اور اگر یہ گاڑیاں قیمتی تکنیکی معلومات نکالنے یا عراق میں امریکی فورسز کے روپ میں استعمال ہوتی ہیں تو یہ مستقبل میں نقصان دہ ہو سکتا ہے۔
انہوں نے کہا کہ اس بارے میں واشنگٹن کی انٹیلی جنس ایجنسیوں سے سنجیدہ سوالات ہونے چاہئیں جنہوں نے ایسی صورتحال کے بارے میں غلط سوچا۔
یہ پروپیگنڈا اس وقت سامنے آیا جب 31 اگست کو افغانستان سے امریکی انخلا کے بعد طالبان کابل میں امریکی ساز و سامان اور آلات کے ساتھ پریڈ کرتے نظر آئے۔ قافلے میں ہمویز اور بارودی سرنگوں سے بچنے کے لیے بھاری بکتر بند گاڑیاں شامل تھیں۔
سوشل میڈیا پر ایک ویڈیو کلپ پوسٹ کیا گیا ہے جس میں دعویٰ کیا گیا کہ ایران نے کچھ امریکی ٹینک بھی حاصل کیے ہیں۔ افغان سکیورٹی فورسز کو امریکا کی جانب سے 70 ہزار سے زیادہ فوجی گاڑیاں مہیا کی گئیں۔
دوسری جانب واشنگٹن نے کہا ہے کہ ایران نے عسکری اور فوجی آلات کی تربیت کے ذریعے طالبان کے اچانک اقتدار میں آنے میں مدد کی ہے۔
