کراچی: ملت ایکسپریس میں خاتون پر تشدد اور موت کی ابتدائی انکوائری رپورٹ سامنے آگئی، جس میں عینی شاہد مسافرعمران کا بیان شامل ہیں۔
تفصیلات کے مطابق ملت ایکسپریس واقعہ میں خاتون پر تشدد اور موت کی ابتدائی انکوائری رپورٹ سامنے آگئی ، جس میں بتایا گیا ہے کہ ریلوےپولیس کانسٹیبل کی جانب سے خاتون پر تشدد کی ویڈیووائرل ہوئی ، جس کے بعد کانسٹیبل کوفوری طور پر گرفتاراور مقدمہ درج کرکے محکمانہ کارروائی شروع کی گئی۔
ابتدائی انکوائری رپورٹ میں کہا گیا ہے کہ کوچ نمبر6میں 2بچوں کےساتھ ایک خاتون سوار ہوئیں تھیں ، عینی شاہد مسافرعمران نے بتایا کہ خاتون نے داخل ہوکرشورمچانااورمسافروں پرتھوکناشروع کردیا، جس پر دیگرمسافروں نے ڈیوٹی پر موجودریلوے پولیس اہلکاروں سےشکایت کی۔
مسافرعمران کا کہنا تھا کہ خاتون آدھے گھنٹے تک خاموش نہ ہوئی توکانسٹیبل نے مارنا شروع کردیا،کانسٹیبل خاتون کو مارتے ہوئے بچوں سمیت دورلےگیا، پھر ٹرین چنی گوٹھ کے قریب پہنچی توسنا کہ عورت نے چھلانگ لگا دی ہے۔
ملت ایکسپریس واقعہ کے عینی شاہد نے کہا کہ کانسٹیبل میرحسن 7 اپریل سے 8اپریل تک، کراچی، جامشورو اورحیدرآبادمیں گھوم رہا تھا اور خاتون کی موت کے وقت اورمقام پرمذکورہ ٹرین میں موجود نہیں تھا۔
انکوائری رپورٹ میں مزید کہا گیا کہ اےایس آئی تنویر نے خاتون کےمعاملےپرلیڈی کانسٹیبل سے مدد لینے کی زحمت نہیں کی اور اےایس آئی صورتحال کو سنبھال نہ سکے،ڈیوٹی میں سنگین غفلت کامرتکب ہوئے جبکہ ایس ایچ اوغلام حسین صورتحال سےآگاہ ہونے کے باوجود ذمہ داری سےکام کرنے میں ناکام رہے۔
