کراچی: ملت ایکسپریس واقعے میں خاتون کو مبینہ طور پر چلتی ٹرین سے دھکا دے کر قتل کیے جانے کا انکشاف ہوا ہے۔
تفصیلات کے مطابق ریلوے پولیس اہلکار کے تشدد کا نشانہ بننے والی خاتون مریم بی بی کو مبینہ طور پر چلتی ٹرین سے دھکا دے کر قتل کیے جانے کا انکشاف ہوا ہے۔
خاتون مریم بی بی کے بھتیجے نے اے آر وائی نیوز کو بتایا کہ پولیس اہلکار اس کی پھپھو کو گھور رہا تھا اور کہہ رہا تھا آگے چلو، پھپھو کا روزہ تھا، لیکن اہلکار پھپھو کو لے کر چلے گئے۔ خاتون کے بھائی نے بھی الزام عائد کیا ہے کہ جس اہلکار نے ان کی بہن پر تشدد کیا اسی نے بہن کو قتل کیا ہے، ملزم کوسخت سزا دینے کا مطالبہ کرتے ہیں۔
مبینہ طور پر قتل ہونے والی خاتون کی بہن نے بتایا کہ اس کی لاش ٹکڑوں میں ملی، مریم بی بی کراچی میں بیوٹی پارلر میں ملازمت کرتی تھی، اور عید کی چھٹیوں پر گھر واپس جا رہی تھی۔ واضح رہے کہ خاتون اور بچوں پر ٹرین میں ریلوے پولیس اہلکار کے تشدد کی ویڈیو سوشل میڈیا پر وائرل ہوئی ہے۔
ملت ایکسپریس میں ریلوے پولیس اہلکار کے تشدد کا نشانہ بننے والی خاتون مریم بی بی کے بھائی افضل نےالزام عائد کیا ہے کہ ریلوے پولیس اہلکار تشدد کے بعد میری بہن کو ساتھ لے گیا تھا، ویڈیو میں تو دیکھا جا سکتا ہے کہ اہلکار میری بہن کو مارتے ہوئے دھکے دیتے ہوئے لے جا رہا تھا، اور بچے کو ان سے الگ کر دیا تھا، پھر 8 اپریل کو اس کی لاش وہیں اسٹیشن سے ملی۔
ترجمان ریلوے کا مؤقف
ترجمان ریلوے کے مطابق ملت ایکسپریس میں پولیس تشدد کا شکار ہونے والی خاتون نے خود کشی کر لی تھی، ڈی آئی جی ریلوے پولیس ساؤتھ زون کی سربراہی میں چار رکنی انکوائری کمیٹی مزید تحقیقات کر رہی ہے، مریم بی بی کراچی سے فیصل آباد جا رہی تھی، دورانِ سفر خاتون نے مسافروں کا سامان بکھیرنا شروع کر دیا جس پر مسافروں نے پولیس کانسٹیبل کو بلایا۔
ترجمان کے مطابق کانسٹیبل نے خاتون پر ہاتھ اٹھایا اور اسے دوسرے ڈبے میں شفٹ کر دیا، کانسٹیبل کی ڈیوٹی کراچی سے حیدرآباد تک تھی، خاتون نے چلتی ٹرین سے چنی گوٹھ میں چھلانگ لگائی، خاتون کے ساتھ سفر کرنے والے مسافروں کے بیان کے مطابق خاتون نے اچانک چلتی ٹرین سے چھلانگ لگا دی تھی۔
ترجمان کا کہنا تھا کہ خاتون کے لواحقین کے مطابق خاتون کا ذہنی توازن درست نہیں تھا، پولیس کانسٹیبل کو انتہائی غیر مناسب رویے پر گرفتار کر لیا گیا ہے اور اس کے خلاف مقدمہ درج کیا گیا ہے، جب کہ قائم ہونے والی کمیٹی تین روز میں چیئرمین ریلوے کو رپورٹ پیش کرے گی۔
