آسٹریلیا میں لاکھوں کی تعداد میں کیکڑے سڑکوں پر آگئے جس کی وجہ سے سڑکیں بند کردی گئیں، کیکڑوں کی اتنی بڑی تعداد میں سڑکوں پر آںے کی ویڈیو وائرل ہوگئی۔
غیرملکی خبررساں ادارے کی رپورٹ کے مطابق آسٹریلیا میں کرسمس جزائر کے پاس کئی سڑکوں کو بند کردیا گیا کیونکہ قریبی جنگلات سے سرخ کیکڑوں کی بڑی تعداد سمندر کی جانب جارہی تھی۔
رپورٹ کے مطابق رواں سال پانچ کروڑ کیکڑے نقامی کرنے کے لیے جارہے تھے۔
سرخ رنگت کی بنا پر انہیں آتشیں (فلیم) سرخ کیکڑے کہا جاتا ہے، اب یہ حال ہے کہ یہ گرمی کے باعث کرسمس جنگلات سے نکل کر تیزی سے سمندر کی طرف بھاگ رہے ہیں اور سڑکوں، پلوں اور رکاوٹوں کو عبور کرتے ہوئے ساحل تک پہنچ رہے ہیں۔
سرخ کیکڑوں کی وجہ سے سڑکیں بند کردی گئیں لیکن عملہ پھر بھی صفائی پر مامور ہے تاکہ وہ پاؤں یا کار تلے روندے نہ جائیں، اس دوران لوگوں کو مشکلات کا سامنا بھی کرنا پڑا اور وہ اپنے گھروں میں ہی محدود رہے کیونکہ سڑک پر سرخ کیکڑوں کی یلغار ہوچکی تھی۔
نیشنل پارک کی قائم مقام مینیجر بیانکا پریسٹ کہتی ہیں کہ یہ دلفریب واقعہ ہرسال رونما ہوتا ہے۔ جنگلی حیات کے ممتاز ماہر سر ڈیوڈ اینٹن بورو کے مطابق یہ خوبصورت فطری منظر ہے کہ گویا ایک طویل سرخ قالین جنگلات سے ہوتا ہوا سڑکوں تک جارہا ہے اور سمندر میں جاکر مل رہا ہے۔
انہوں نے کہا کہ فی الحال پارک انتظامیہ نے کئی سڑکیں رکاوٹوں سے بند کی ہوئی ہیں۔
