لاہور: پاکستان عسکری جدوجہد سے نہیں، طویل سیاسی جدوجہد سے بنا، مگر پاکستانی تاریخ سے نہ تو سیاست دانوں نے کچھ سیکھا، نہ ہی اداروں نے۔ ایک دوسرے کا گریبان پکڑنے سے مسائل اور تلخیاں بڑھیں گی۔
ان خیالات کا اظہار ن لیگ کے سینئر رہنما سعد رفیق نے قائد اعظم کے یوم ولادت اور نواز شریف کی سال گرہ کی تقریب سے خطاب کرتے ہوئے کیا۔
ان کا کہنا تھا کہ تین بار لوگوں نے ووٹ کے ذریعے نواز شریف کو وزیر اعظم بنایا، مگر تینوں بار عوام کے فیصلے کا مذاق اڑایا گیا۔ لیڈرکون ہوگا، اس کا فیصلہ سیاسی کارکنوں کو کرنے دیا جائے۔
یہ بھی پڑھیں: عمران خان،طاہرالقادری سیاسی اسٹنٹ مین ہیں، سعد رفیق
اس موقع پر انھوں نے عدلیہ پر کڑی نکتہ چینی کی۔ ان کا کہنا تھا کہ عدلیہ کے خلاف محاذ آرائی کے قائل نہیں، بابوں کی عزت کرنی چاہیے، لیکن سیاسی جماعتوں کی بھی کوئی عزت ہے، اداروں کااحترام لازم ہے تو کیا پارلیمنٹ کا احترام لازم نہیں، عدالت کے فیصلے پر بات کرنا ہمارا حق ہے۔
وزیر ریلوے سعد رفیق کا کہنا تھا کہ چند افراد کے فیصلے سے ملک کی تقدیر نہیں بدلے گی، سیاست پر پہرے نہ لگائے جائیں، دھرنے ہمیں آگے نہیں جانے دیں گے۔ ہمیں کام نہیں کرنے دیا گیا، جس کا نقصان پاکستان کو ہوگا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
