اسلام آباد: وفاقی وزیرِ اطلاعات فواد چوہدری نے ملک میں جاری توانائی بحران کے سلسلے میں اقدامات کا عندیہ ظاہر کرتے ہوئے کہا ہے کہ توانائی کے مسائل کے حل کے لیے ماہرین سے مشاورت کی جا رہی ہے۔
وہ اسلام آباد میں میڈیا سے گفتگو کر رہے تھے، انھوں نے کہا ’وفاقی کابینہ نے سیاسی بھرتیاں نہ کرنے کا فیصلہ کیا ہے، شاہانہ طرزِ حکومت کے لیے خریدی گئیں تمام اضافی گاڑیاں نیلام کر دی جائیں گی۔‘
فواد چوہدری کا کہنا تھا کہ وزیرِ اعظم عمران خان کا قوم سے خطاب غیر روایتی تھا، عمران خان نے اپنے خطاب کے پوائنٹ خود ترتیب دیے، جو ان کے دل میں ہوتا ہے وہی زبان پر بھی ہوتا ہے، وہ ڈھکی چھپی نہیں، کھل کر بات کرتے ہیں۔
وزیرِ اطلاعات نے مزید کہا کہ گزشتہ حکومت نے سارک کانفرنس کے نام پر قیمتی گاڑیاں منگوائیں، ماضی کے حکمرانوں کے غلط اقدامات سے خود ان کی ساکھ متاثر ہوئی۔
منی لانڈرنگ سے باہر گیا پیسہ واپس لانے کیلیے ٹاسک فورس بنائیں گے، عمران خان
انھوں نے کہا بیرونی قرضوں پر سود کی ادائیگی کے لیے قرضے لینے پڑ رہے ہیں، سب کو ہدایت کی گئی ہے کہ تمام وزارتیں اپنے اخراجات کو کم کریں، گورنر ہاؤسز کے بہتر استعمال کی حکمت عملی بھی ترتیب دی جا رہی ہے۔
انھوں نے امید ظاہر کی کہ معاشی چیلنجز پر قابو پانے میں کام یاب ہوجائیں گے، عمران خان چاہتے ہیں معاشی بہتری میں سمندر پار پاکستانی کردار ادا کریں، وہ ہمارے لیے بہت بڑا اثاثہ ہیں۔
