کراچی : سندھ کے وزیر تعلیم سید سردار شاہ نے کہا ہے کہ اگر پرائیویٹ اسکولوں نے عدالتی حکم پر فیسوں میں کمی نہ کی تو انیل کپور کی طرح چھاپے مار کر اسکول بند کرادوں گا۔
یہ بات انہوں نے کراچی میں میڈیا سے گفتگو کرتے ہوئے کہی، صوبائی وزیر تعلیم سید سردار شاہ بالی ووڈ اسٹار انیل کپور کے فین نکلے۔
ان کا کہنا ہے کہ سپریم کورٹ کے حکم کے مطابق پانچ ہزار سے زائد فیسیں لینے والے اسکول اپنی فیس میں بیس فیصد کمی کریں اگر نہیں کریں گے تو میں میڈیا کے ہمراہ انیل کپور کی فلم نائیک کی طرح چھاپے مار کر اسکول بند کردیں گے۔
فلم نائیک کے ہیرو انیل کپور نے تو اپنی اسٹیٹ کی حالت بدل دی تھی اب دیکھنا یہ ہے کہ سید سردار شاہ صوبے میں تعلیم کی حالت بدلتے ہیں یا نہیں؟
مزید پڑھیں : چیف جسٹس کا تمام نجی اسکولوں کی فیسوں میں کمی کا حکم
واضح رہے کہ سندھ ہائی کورٹ نے ستمبر2017 سے قبل کا فیس اسٹرکچر بحال کرنے کا حکم دیتے ہوئے نجی اسکولوں کو تین ماہ کی پیشگی فیس لینے سے روک دیا تھا۔
نجی اسکولوں کے خلاف توہین عدالت کی کارروائی کے کیس کی سماعت کے دوران عدالت نے 20 ستمبر 2017 سے قبل کا فیس اسٹرکچر بحال کرنے کا حکم دیا جبکہ 20 ستمبر 2017 کے بعد وصول کی جانے والی اضافی فیس غیر قانونی قرار دے دی تھی۔
عدالت کا کہنا کہ اگر فیس وصول کربھی لی گئی ہے تو ایسے ایڈجسٹ کیا جائے ورنہ توہین عدالت میں فرد جرم عائد کریں گے۔
