اسلام آباد : وزیراعظم شہباز شریف نے نو منتخب وزراء مملکت اور مشیروں کو قلمدان دینے کیلئے مشاورت مکمل کرلی ہے۔
اے آر وائی نیوز کی رپورٹ کے مطابق ذرائع کا کہنا ہے کہ کل نو منتخب وزرا کو قلمدان ملنے کا امکان ہے۔
رپورٹ کے مطابق وزیراعظم کے مشیر محمد علی کو نجکاری اور وفاقی وزیرعلی پرویز ملک کو پیٹرولیم کی وزارت ملنے کا امکان ہے۔
ڈاکٹر مصدق ملک کو ماحولیاتی تبدیلی جبکہ ڈاکٹر توقیر کو کابینہ و اسٹیبلشمنٹ ڈویژن کی وزارت اور حنیف عباسی کو ریلوے، مصطفی کمال کو سائنس اینڈ ٹیکنالوجی کی وزارت ملنے کا امکان ہے۔
اس کے علاوہ رضا حیات ہراج کو پارلیمانی امور، خالد مگسی کو وزارت پانی اور پرویزخٹک کو بین الصوبائی رابطہ کی وزارت ملنے کا امکان ہے۔
رپورٹ کے مطابق ڈاکٹرطارق فضل چوہدری کو وزارت صحت جبکہ شیزہ فاطمہ کو وزارت آئی ٹی ملنے کا امکان ظاہر کیا جارہا ہے۔
واضح رہے کہ وزیراعظم شہباز شریف نے چند روز قبل وفاقی کابینہ میں 25 نئے وزرا، وزرائے مملکت اور مشیروں کو شامل کیا ہے جس کے بعد کابینہ کی کل تعداد 50 ہوگئی ہے۔
اس وقت وفاقی کابینہ میں میں 30 وفاقی وزرا، 9 وزرا مملکت، 4 مشیر اور 7 معاونین خصوصی شامل ہیں۔
کابینہ میں شامل وزرا میں سے 18 وزرا وزارتیں اور ڈویژنز چلارہے ہیں، وزیر اعظم شہباز شریف نے بھی 5 وزارتوں اور 2 ڈویژنز کے قلمدان سنبھال رکھے ہیں۔
اس کے علاوہ 2 وزرا کے پاس 3 قلمدان جبکہ 9 وزرا کے پاس 2 وزارتوں کے قلمدان ہیں، نئے وزراء کو تاحال قلمدان نہیں دیے گئے ہیں۔
