اسلام آباد : الیکشن کمیشن کو عام انتخابات کیلئے مزید 17 ارب 40 کروڑ روپے کے فنڈز جاری کر دئیے گئے، وزارت خزانہ کا کہنا ہے کہ الیکشن کمیشن کو جب فنڈزکی ضرورت ہوگی رقم جاری کی جائے گی۔
تفصیلات کے مطابق وزارت خزانہ کی جانب سے الیکشن کمیشن کو عام انتخابات کیلئے 17 ارب 40 کروڑ روپے کے فنڈز جاری کر دئیے گئے۔
وزارت خزانہ نے اعلامیے میں کہا ہے کہ جولائی میں عام انتخابات کیلئےالیکشن کمیشن کو 10 ارب جاری کئے جاچکےہیں، الیکشن کمیشن کو مجموعی طور پر27 ارب 40 کروڑ کی رقم فراہم کی گئی۔
اعلامیے میں کہنا تھا کہ الیکشن کمیشن کی ضروریات کے مطابق فنڈز کی فراہمی کیلئے پرعزم ہیں، الیکشن کمیشن کو جب فنڈزکی ضرورت ہوگی رقم جاری کی جائے گی۔
گذشتہ روز الیکشن کمیشن نے عام انتخابات کیلئے مختص فنڈز کی عدم فراہمی کا نوٹس لیتے ہوئے سیکرٹری خزانہ کو طلب کیا تھا۔
ذرائع الیکشن کمیشن نے کہا تھا کہ مالی سال کے بجٹ میں عام انتخابات کیلئے42 ارب روپے مختص کیے گئے ہیں اور وزارت خزانہ نے ابتک 10 ارب روپےجاری کئے ہیں، باقی رقم کی فراہمی بغیر کسی جواز کے تعطل کا شکار ہے۔
ذرائع کا کہنا تھا کہ الیکشن کمیشن کو8 فروری کےانتخابات کیلئےفوری طورپر17 ارب درکارہیں، رقم کی فراہمی کیلئےالیکشن کمیشن نے وزارت خزانہ سے بارہا رجوع کیا، وزارت خزانہ کو تحریری یاددہانی بھی کرائی، جس کا مثبت جواب نہیں دیا گیا۔
