قومی ٹیم کے سابق کپتان مصباح الحق کو ٹیسٹ یم کا ہیڈ کوچ بنائے جانے کا امکان ہے۔
اے آر وائی نیوز کے پروگرام ’اسپورٹس روم‘ میں گفتگو کرتے ہوئے تجزیہ کار شاہد ہاشمی نے بتایا کہ قومی ٹیسٹ ٹیم کے ہیڈ کوچ مصباح الحق ہوں گے۔
انہوں نے کہا کہ ثقلین مشتاق کا نام بھی سامنے آیا تھا لیکن مصباح اس وقت فیوریٹ ہیں۔
شاہد ہاشمی نے بتایا کہ پچھلے دو سال میں آٹھ کوچز بدل چکے ہیں اور اب یہ نواں کوچ ہوگا۔
دوسری جانب سابق کرکٹر باسط علی کا بھی کہنا ہے کہ مصباح الحق ریڈ بال ٹیم کے ہیڈ کوچ بننے کے لیے تیار ہیں۔
سماجی رابطے کی ویب سائت ایکس پر باسط علی نے پی سی بی اور مصباح کی جانب سے کوئی تصدیق نہ ہونے کے باوجود سابق کپتان کو مبارک باد پیش کی۔
انہوں نے لکھا کہ ’ریڈ بال کے ہیڈ کوچ مصباح الحق، مبارک ہو، انہوں نے مصباح کی ٹیسٹ جرسی کے ساتھ تصویر بھی شیئر کی ہے۔
واضح رہے کہ پی سی بی نے نیوزی لینڈ کے مائیک ہیسن کو وائٹ بال ٹیم کا ہیڈ کوچ مقرر کیا ہے۔
نیوزی لینڈ کرکٹ ٹیم کےسابق ہیڈ کوچ مائیک ہیسن عاقب جاوید کی جگہ پاکستان کے ہیڈ کوچ بننے کے لیے مضبوط امیدوار تھے، وہ اس وقت اسلام آباد یونائیٹڈ کے بھی ہیڈ کوچ ہیں۔
