لاہور: پاکستان سینئر ٹیم کے ہیڈ کوچ مصباح الحق اور بولنگ کوچ وقار یونس نے نیشنل کرکٹ اکیڈمی میں انڈر 19 کرکٹ ٹیم سے ملاقات کی۔
تفصیلات کے مطابق قومی کرکٹ ٹیم کے ہیڈ کوچ مصباح اور بولنگ کوچ وقار یونس نے نیشنل کرکٹ اکیڈمی میں انڈر 19 ٹیم سے ملاقات کی، دونوں کوچز نے اپنے تجربے کے حوالے سے نوجوان کھلاڑیوں کو ورلڈ کپ میچز میں اچھی کارکردگی دکھانے کے لیے ٹپس دیں اور حوصلہ بڑھایا۔
ہیڈ کوچ مصباح الحق نے کہا کہ اپنی شناخت بنانے کے لیے انڈر 19 ایک اچھا پلیٹ فارم ہے، غیرمعمولی کارکردگی کا مظاہرہ کرکے انڈر 19 کھلاڑی قومی ٹیم میں جگہ بناسکتے ہیں۔
بولنگ کوچ وقار یونس نے فاسٹ بولرز کے ساتھ خصوصی طور پر کام کیا، ان کا کہنا تھا کہ نوجوان کھلاڑی باصلاحیت ہیں اور ورلڈ کپ جیت سکتے ہیں۔
Pakistan senior team's head coach @captainmisbahpk and bowling coach @waqyounis99 visited the @ICC #U19CWC bound Pakistan squad. The legendary duo shared their experiences and gave valuable tips to the youngsters #PakistanFutureStars pic.twitter.com/ink0BAqbDa
— Pakistan Cricket (@TheRealPCB) January 7, 2020
وقار یونس نے ٹیم کو کھیل پر فوکس کرنے کا مشورہ دیتے ہوئے کہا کہ فاسٹ بولرز کو جنوبی افریقہ کی پچز سے بڑی مدد ملتی ہے۔
واضح رہے کہ گزشتہ روز وکٹ کیپر بیٹسمین سرفراز احمد نے بھی این سی اے لاہور میں قومی انڈر 19 کرکٹ ٹیم کے کھلاڑیوں سے ملاقات کی تھی اور نوجوان کھلاڑیوں کو مفید مشورے دئیے تھے۔
سرفراز احمد کا کہنا تھا کہ آئی سی سی انڈر 19 کرکٹ ورلڈ کپ 2020 کے لیے منتخب کردہ قومی اسکواڈ میں شامل تمام کھلاڑی بہترین صلاحیتوں کے مالک ہیں اور یہ ٹیم ورلڈ کپ جیتنے کی صلاحیت رکھتی ہے۔
یاد رہے کہ 9 روزہ تربیتی کیمپ میں شرکت کے بعد قومی انڈر 19 اسکواڈ 10 جنوری کو جنوبی افریقا روانہ ہوگا، جہاں میگاایونٹ کا آغاز 17 جنوری سے ہوگا۔
