کراچی: سول اسپتال میں 300 آسامیوں کے لیے ہزاروں امیدوار پہنچ گئے، بدانتظامی کے باعث پولیس نے امیدواروں پر لاٹھی چارج کردیا۔
تفصیلات کے مطابق کراچی کے سول اسپتال میں 1 سے 5 گریڈ کی 300 آسامیوں کے لیے ہزاروں امیدوار پہنچ گئے جن میں خواتین بھی شامل تھیں جبکہ پولیس کو گیٹ کے سامنے سے رش ہٹانے کے لیے لاٹھی چارج کرنا پڑ گیا۔
نمائندہ اے آر وائی نیوز آصف خان کے مطابق کراچی ہی نہیں اندرون سندھ سے بھی لوگ امیدوار انٹرویوز کے لیے پہنچے تھے، انتظامیہ کی جانب سے کوئی خاطر خواہ انتظامات نہیں کیے گئے تھے جس کی وجہ سے بدنظمی ہوئی۔
جن امیدواروں کے رجسٹریشن فارم جمع نہ ہوسکے ان کا کہنا تھا کہ صبح چھ بجے سے یہاں پر موجود ہیں سول اسپتال انتظامیہ کی جانب سے کوئی مثبت جواب نہیں دیا جارہا ہے جبکہ پولیس لاٹھی چارج کررہی ہے۔
ایم ایس سول اسپتال کا کہنا ہے کہ انٹرویو کے لیے آنے والے تمام امیدوار ہمارے بچے ہیں، بے روزگاری کے عالم میں جذباتی پن موجود ہے تاہم پھر بھی حالات کو سنبھالا ہے۔
انہوں نے اعتراف کیا کہ تھوڑی سی بدمزگی ہوئی لوگوں کا رش زیادہ تھا جس کی وجہ سے ہمارے انتظامات درہم برہم ہوئے تاہم رات گئے تک انٹرویوز کا سلسلہ جاری رہے گا۔
ایم ایس سول اسپتال نے کہا کہ 6 سے 15 گریڈ پر آن لائن فارم جمع کرائے جارہے ہیں جبکہ 1 سے 5 گریڈ کے امیدواروں کے ڈائریکٹ انٹرویو لیے جارہے ہیں۔
انہوں نے کہا کہ جن کی رجسٹریشن ہوچکی ہے وہ انٹرویو کمیٹی کے سامنے پیش ہورہے ہیں، لگتا یہی ہے کہ 10 ہزار امیدوار یہاں پہنچے ہیں تاہم رینجرز اور پولیس نے صورت حال پر قابو پالیا ہے۔
