بنکاک: تھائی لینڈ کے  ایک گھر کی پالتو  بلی پُراسرار طور پر لاپتہ ہوئی اور پھر وہ مردہ حالت میں اژدھے کے پیٹ سے برآمد ہوئی۔

تھائی لینڈ سے تعلق رکھنے والی خاتون ’کانچی نرد‘ اور اُن کی بیٹی ’گراشیا‘ نے گزشتہ دنوں بتایا تھا کہ اُن کی بلی لاپتہ ہوگئی تھی، جس کو بہت تلاش کیا مگر وہ نہ مل سکی۔

خاتون نے بتایا تھا کہ انہوں نے بلی ’فیلین ہو جن‘ کو آخری بار گھر میں دیکھا تھا، تھوڑی دیر بعد وہ کہیں چلی گئی، جس کا کئی گھنٹے انتظار کیا مگر وہ نہ ملی۔

خاتون کا کہنا تھا کہ ’ہم یہ سمجھ رہے تھے کہ شاید وہ گھر میں کہیں بیٹھی ہوگی یا پھر باہر نکل گئی ہوگی‘۔

نچی نرد نے بتایا کہ جس دوران اُن کی بیٹی بلی کو تلاش کررہی تھی، اُسی دوران اُس کی نظر گھر میں آئے ہوئے اژدھے پر پڑی جس کا پیٹ پھولا ہوا تھا۔

’بیٹی سانپ کو دیکھ کر بہت زیادہ خوفزدہ ہوگئی تھی اور اُس نے خدشہ ظاہرکیا تھا کہ سانپ بلی کو کھا گیا ہوگا‘۔

خاتون نے محکمہ جنگلی حیات کے دفتر فون کر کے سانپ کی موجودگی کے حوالے سے اطلاع دی جس کے بعد رضاکاروں نے وہاں پہنچ کر اژدھے کو قابو کیا اور پھر اُس کا پیٹ چاک کیا تو اندر بلی موجود تھی۔

بلی کو مردہ حالت میں دیکھ کر خاتون کی بیٹی زار و قطار رونے لگی اور پھر اُس نے بلی کی یادگار تصاویر سماجی رابطے کی ویب سائٹ پر شیئر کر کے ساری کہانی بیان کی۔

Comments